Փերինչեքը ՄԻԵԴ-ում իրեն «եվրոպացիների ազատության» պաշտպան է համարել

ՄԻԵԴ-ում այսօր սկսված «Փերինչեքն ընդդեմ Շվեյցարիայի» դատական նիստում իր փաստաբան Մեհմեթ Ջենգիզի ներածական ելույթից հետո պաշտպանական ճառով հանդես է եկել դատական գործի գլխավոր անձ, Թուրքիայի Աշխատավորական կուսակցության առաջնորդ Դողու Փերինչեքը:

«Արմենպրես»-ը հատվածներ է ներկայացնում Փերինչեքի' թուրքական մամուլում հայտնված պաշտպանական ճառից:

Նշելով, որ Ստրասբուրգում է գտնվում «եվրոպացիների ազատության» համար, Փերինչեքը հայտարարել է, որ ՄԻԵԴ-ում «պաշտպանում» է «Եվրոպայում և Թուրքիայում հաշտությունն ու եղբայրությունը»: Նա կրկնել է Թուրքիայի կողմից բազմիցս չարչրկված' «Հայոց ցեղասպանությունն իմպերիալիստների սուտն է» թեզը, և հայտարարել, որ 1915 թվականի իրադարձությունները «քննարկելի» լինելն, իբր, պաշտպանել են նաև Պոլսո հայոց պատրիարքի փոխանորդ Աթեշյանն ու արքեպիսկոպոս Նշանյանը, ովքեր նույնպես, իբր, համամիտ են, որ այդ պնդումները «արտաքին ուժերի դերակատարության» արգասիք են:

Փերինչեքն անամոթաբար հայտարարել է, որ 1915 թվականի իրադարձությունները ցեղասպանություն «չլինելն ապացուցող» 90 կգ, իբր, ռուսական և հայկական «փաստաղթեր» է ներկայացրել ՄԻԵԴ: Նա ասել է, որ «ցեղասպանությունն իրավական բնորոշում է», և ինքն այդ հարցում պատասխանատու է համարում «մեծ երկրներին»:

Նա նաև հայտարարել է, որ Եվրոպան «արգելք» է դրել Հայոց ցեղսպանությանը դեմ պնդումներին և դրանով «նվաստացրել» թուրքերին, թույլ չի տալիս պաշտպանվել նրանց, և որ, իբր, հայերը նույնպես նման ճնշումների են ենթարկվում և գտնվում «այդ ընկճիչ եզրույթի» մեջ:

«Արտահայտվելու ազատությունը երաշխավորող որոշումով ՄԻԵԴ-ը կդատապարտի նաև ատելություն սերմանող այդ արտահայտությունը»,- «հույս» է հայտնել նա:

2008 թվականին Շվեյցարիայի դատարաններից մեկը Թուրքիայի աշխատավորական կուսակցության նախագահ Դողու Փերինչեքին դատապարտել էր Հայոց ցեղասպանությունը ժխտելու համար: Փերինչեքը դիմել էր ՄԻԵԴ, և անցյալ տարվա դեկտեմբերին եվրոպական դատարանը բավարարել էր Շվեյցարիայի դեմ նրա հայցը: Շվեյցարիան բողոքարկել է ՄԻԵԴ վճիռը: