Դաժան սպանություն՝ Երևանում. ոստիկանները տան մեջ բռնել են սպանությունը կատարած 2 տղամարդու և 1 կնոջ

Երևանի քննչական վարչության Աջափնյակ և Դավիթաշեն վարչական շրջանների քննչական բաժնում հարուցվել է քրեական գործ՝ Աջափնյակի բնակիչ, 1946 թվականի ծնված, ՌԴ քաղաքացի Արշավիր Բարսամյանի սպանության դեպքի առթիվ։ Այս մասին հայտնում են Քննչական կոմիտեի մամուլի ծառայությունից: 

Հունվարի 31-ի առավոտյան ահազանգ է ստացվել՝ Ֆուչիկի 24 շենքի բնակարաններից մեկից աղմուկի ձայներ լսվելու մասին։ Ահազանգի հիման վրա անմիջապես դեպքի վայր են մեկնել ոստիկանության ծառայողները և բնակարանում հայտնաբերել Բարսամյանի դին և ևս երեք անձի։

Ըստ ոստիկանության մամուլի ծառայության՝ նույն բնակարանից ոստիկանության Մաշտոցի բաժին բերման ենթարկվածները երկու տղամարդ և մեկ կին են՝ 1937 թ. ծնված Բ. Ե.-ն, 1950 թ. ծնված Ռ. Մ.-ն և 1952 թ. ծնված Է. Ծ.-ն:

Դեպքի առթիվ հարուցվել է քրեական գործ՝ 104-րդ հոդվածի հատկանիշներով:

Ձեռնարկվում են անհրաժեշտ քննչական գործողություններ՝ սպանության բոլոր հանգամանքները պարզելու ուղղությամբ։

Լուսանկարը՝ Shamshyan.com-ի