Խիստ նկատողություն նախարարի վարորդին՝ ոչ սթափ վիճակում ծառայողական մեքենան վարելու համար

Ավելի վաղ տեղեկացրել էինք, որ ոստիկանության ծառայողները ճանապարհային երթևեկության կանոնները չարամտորեն խախտելու համար Օրբելի փողոցում կանգնեցրել են Toyota Camry մակնիշի 006 ԼԼ 55 համարանիշի ավտոմեքենան, որը հաշվառված է ՀՀ Առողջապահության նախարարության հաշվեկշռում և այն որպես ծառայողական ավտոմեքենա սպասարկում է առողջապահության նախարար Արմեն Մուրադյանին:

Ինչպես Լուրեր.com-ին տեղեկացրին ՀՀ առողջապահության նախարարության տեղեկատվության և հասարակայնության հետ կապի վարչությունից, Առողջապահության նախարարության աշխատակազմի վարորդ Շահեն Դուրգարյանը ենթարկվել է կարգապահական տույժի:

«Հիմք ընդունելով ՀՀ աշխատանքային օրենսգրքի 223-րդ հոդվածը' համապատասխան հրամանով Հայաստանի Հանրապետության առողջապահության նախարարության աշխատակազմի վարորդ Շահեն Դուրգարյանի նկատմամբ կիրառվել է «խիստ նկատողություն»  կարգապահական տույժը»: