Շիրակի մարզի դատախազությունում կայացել է փակ խորհրդակցություն

Շիրակի մարզի դատախազությունում կայացել է փակ խորհրդակցություն' Հայաստանի գլխավոր դատախազի տեղակալ Հրաչ Բադալյանի մասնակցությամբ: Քննարկմանը ներկա էին Շիրակի մարզպետ Ֆելիքս Ցոլակյանը, Շիրակի մարզի ոստիկանապետ Վարդան Նադարյանը, Շիրակի մարզի ոստիկանության բոլոր բաժինների պետերը, Ազգային անվտանգության ծառայության Շիրակի մարզի ներկայացուցիչները:

Ինչպես լրագրողներին տեղեկացրեց Շիրակի մարզպետ Ֆելիքս Ցոլակյանը, խորհրդակցության ժամանակ ամփոփվել են ոլորտի 2014 թվականի աշխատանքները: «Հանդիպումը կապ չուներ Սառնաղբյուր գյուղի բնակիչ, 22-ամյա Մնացական Ալեքսանյանի ձերբակալման հետ»,- «Արմենպրես»-ի հաղորդմամբ' լրագրողներին վստահեցրել է Ֆելիքս Ցոլակյանը:

Մարզի դատախազության առջև ավելի վաղ հավաքված մի խումբ ակտիվիստներ պահանջում էին հանդիպում մարզի դատախազի հետ և պարզաբանում՝ նախօրեին Շիրակի մարզի Սառնաղբյուր գյուղի բնակիչ 22-ամյա Մնացական Ալեքսանյանի ձերբակալման վերաբերյալ: Նշենք, որ փետրվարի 14-ին Շիրակի մարզի Սառնաղբյուր գյուղի բնակիչ Մնացական Ալեքսանյանը բերման է ենթարկվել Շիրակի մարզի Մարալիկի քննչական բաժին և ժամը 19:00-ի սահմաններում ձերբակալվել՝ Գյումրիում ՌԴ հյուպատոսարանի մոտ հունվարի 15-ին տեղի ունեցած միջադեպի առնչությամբ:

Մնացական Ալեքսանյանի փաստաբան Հայկ Հարությունյանը լրագրողների հետ ունեցած ճեպազրույցի ժամանակ նշեց, որ Մնացական Ալեքսանյանի ձերբակալման իրավական հիմքեր չի տեսնում, քանի որ Մնացականին բազմիցս կանչել են ոստիկանություն և նա չի խուսափել ներկայանալ ոստիկանություն: Այս պահին երիտասարդին դեռ մեղադրանք առաջադրված չէ: Ձերբակալման արձանագրության մեջ, որպես հատկանիշ, նշված է ՀՀ քրեական օրենսգրքի 258 հոդվածի 4-րդ մասը /հասարակական կարգի խախտում, խուլիգանություն/:

Արմենուհի Մխոյան