Ժամկետային զինծառայողին ծեծի ենթարկած զորամասի հետախուզության պետին մեղադրանք է առաջադրվել

ՀՀ Պաշտպանության նախարարության N զորամասի հետախուզության պետ Արման Սահակյանին մեղադրանք է առաջադրվել: Այս մասին է հայտնում դատական տեղեկատվական համակարգը։

ՀՀ ՊՆ N զորամասի հետախուզության պետ, մայոր Արման Սահակյանին ՀՀ քրեական օրենսգրքի 358.1 հոդվածի երկրորդ մասի հատկանիշներով մեղադրանք է առաջադրվել այն բանի համար, որ նա 2014թվականի նոյեմբերի 19-ին ժամը 17:00-ի սահմաններում, զորամասի շարահրապարակում, զինվորական ծառայության պարտականությունները կատարելու կապակցությամբ դիտողություն է արել իր նկատմամբ ստորադաս, նույն զորամասի ժամկետային զինծառայող, շարքային Արմեն Եղոյանին, ինչը վերածվել է վիճաբանության, որի ընթացքում Արման Սահակյանը հրել և ծեծի ենթարկել Արմեն Եղոյանին, հարվածել է վերջինիս ձախ աչքի հատվածին' պատճառելով առողջության թեթև վնասի հատկանիշներ չպարունակող մարմնական վնասվածք:

Էրեբունի և Նուբարաշենի ընդհանուր իրավասության դատարանի դատավոր Վլադիմիր Գրիգորյանը Արման Սահակյանի նկատմամբ որպես խափանման միջոց ընտրել է ստորագրություն չհեռանալու մասին։

Հիշեցնենք, որ վերը նշված զորամասի 2-րդ գումարտակի հակատանկային դասակի հրամանատար, ավագ լեյտենանտ Ռոբերտ Մկրտումյանին ՀՀ քրեական օրենսգրքի 375 առաջին մասի հատկանիշներով և նույն զորամասի հրթիռահրետանային սպառազինության պետ Գրիգորի Նադիրյանին ՀՀ քրեական օրենսգրքի 375 և 376 հոդվածների առաջին մասերի հատկանիշներով'պաշտոնական դիրքերը չարաշահելու համար, նույնպես մեղադրանքներ են առաջադրվել: