Մոսկվայում ձերբակալվել է հայերից և ադրբեջանցիներից բաղկացած հանցախումբը

Մոսկվայում ձերբակալվել է գումար փոխադրողների վրա հարձակում կատարած էթնիկ խմբավորումը, որը բաղկացած էր հայերից և ադրբեջանցիներից: Այս մասին գրել է "Московский Комсомолец" թերթը:

Խուզարկուները վաղուց էին հետապնդում նրանց՝ ուսումնասիրելով նախկինում խմբի կատարած նմանատիպ հանցագործությունները: Ավազակային խմբավորման համար աշխատող իրազեկիչը հայտնել էր, որ չարագործները պատրաստվում են հերթական հարձակումը գործել: Ոստիկանները կապ են հաստատել հնարավոր զոհի հետ և առաջարկել կոշիկի վաճառքով զբաղվող գործարարին թակարդի դեր կատարել:

Փետրվարի 18-ի երեկոյան գործարարն իր «Լեքսուսով» երթևեկելիս նկատել է, որ իր ճանապարհը փակել է «Գազել» մակնիշի մի մեքենա, որից դուրս են եկել ավազակախմբի երեք անդամ, մոտեցել նրա մեքենային, կոտրել դիմապակին՝ փորձելով գողանալ գումարով լի պայուսակը, որի մեջ եղել է 9 800 000 ռուբլի: Այն պահին, երբ պայուսակը չարագործների ձեռքերում էր, նրանց կանգնեցրել են իրավապահ մարմինների աշխատակիցները:

Ձերբակալման ժամանակ չարագործները զինված ակտիվ դիմադրություն են ցուցաբերել՝ մի քանի անգամ կրակելով ոստիկանների ուղղությամբ և ամրանով կոտրելով նրանցից մեկի մետաղե գլխարկը: Ոստիկանները դիմել են զենքի օգնությանը, ինչի արդյունքում հանցագործներից մեկը հրազենային վնասվածքով տեղափոխվել է բուժհաստատություն: