Ոստիկանները հայտնաբերել են վանաձորցի բնակարանագողերին

Ոստիկանության Տարոնի բաժնի ծառայողները Վանաձորի Երևանյան խճուղու թիվ 90 շենքի մոտից, գողություն կատարելու կասկածանքով, բերման են ենթարկել 1984թ. ծնված Արեն Ս.-ին, 1964թ. ծնված Կոնո Պ.-ին և 1977թ. ծնված Վլադիմիր Գ.-ին' վերջինիս վարած «ՎԱԶ-2106» մակնիշի ավտոմեքենայի հետ միասին: Արեն Ս.-ն խոստովանական բացատրություն է տվել, որ մարտի 13-ին' ժամը 23.00-ի սահմաններում, տեխնիկական միջոցների գործադրմամբ մուտքի դռան փականը կոտրելով՝ Վանաձորի Լազյան փողոցի թիվ մի բնակարանից գողացել է 8 անվադող, քարի մշակման և գայլիկոնային հաստոցներ, դաշտային հեռախոս, 40 լ տարողությամբ ալյումինե տարա և շաուրմա պատրաստելու սարքավորում: Գողոնն Արեն Ս.-ն և Վլադիմիր Գ.-ն նշված ավտոմեքենայով տեղափոխել են վերջինիս տան բակում գտնվող ավտոտնակ:

Պարզվել է, որ տուժողը 1940թ. ծնված Ռաֆիկ Ե.-ն է, որը հրավիրվել է ոստիկանություն և հայտնել, որ գողացված իրերի ընդհանուր արժեքը կազմում է մոտ 300.000 դրամ: Գողոնն առգրավված է: Արեն Ս.-ն ձերբակալվել է: Կատարվում է քննություն: