Դատարանը երկարացրեց Լևոն Հայրապետյանի տնային կալանքի ժամկետը

Մոսկվայի Բասմանյան դատարանն ապրիլի 13-ին երկարացրել է «Բաշնեֆտի» գործի ֆիգուրանտ Լևոն Հայրապետյանի տնային կալանքի ժամկետը: Այդ մասին, ինչպես տեղեկացնում է «Արմենպրես»-ը, դատարանի դահլիճից հայտնել է ՌԻԱ Նովոստիի թղթակիցը:

«Դատարանը որոշեց բավարարել հետաքննության միջնորդությունը և երկարացնել Հայրապետյանի նկատմամբ խափանման միջոցը տնային կալանքի տեսքով»,- ասել է դատավոր Նատալյա Դուդարը:

Նիստի ընթացքում քննիչը հայտնել է, որ «Բաշնեֆտ»-ի ընդհանուր գործի հետաքննության ժամկետը, որով հեռակա կարգով ձերբակալված է ընկերության նախկին ղեկավար Ուրալ Ռախիմովը, երկարացվել է մինչև հուլիսի 28-ը: Այդ ժամանակահատվածում, նրա խոսքով, պլանավորվում է առգրավել մի շարք փաստաթղթեր, ինչպես նաև կատարել մի շարք այլ հետաքննչական գործողություններ: Ընդսմին գերատեսչության ներկայացուցիչը չի ճշտել, թե հատկապես ինչ գործողությունների մասին է խոսքը: Դատախազն օրինական և հիմնավորված է համարել հետաքննության պահանջները և պաշտպանել է դրանք:

Պաշտպանությունը նշել է, որ վերջին չորս ամսվա ընթացքում Հայրապետյանի հետ հետաքննչական ոչ մի գործողություն չի անցկացվել, հետևաբար նրան տնային կալանքի տակ պահելու կարիք չկա:

«Մենք տեսնում ենք, որ համատարած քաշքշուկ է, տուժածներն արդեն հարցաքննված են, նրանց հետ առերեսումներն անցկացված են, այնպես որ Հայրապետյանը չի կարող նրանց վրա ճնշում գործադրել»,- հայտարարել է դատապաշտպանը:

Նա նաև հայտնել է, որ Հայրապետյանի գործն անջատված է «Բաշնեֆտի» ընդհանուր գործից և այժմ գտնվում է առանձին վարույթում, գործարարին մեղսագրվում է միայն դատապարտված նախկին սենատոր Իգոր Իզմեստևից միջոցների հափշտակման հետ կապված էպիզոդը:

Այդ կապակցությամբ պաշտպանությունը խնդրում էր մեղադրյալին ազատ արձակել տնային կալանքից, օրինակ, 1 միլիոն ռուբլի գրավի դիմաց:

Հայրապետյանին ավելի վաղ մեղադրում էին 2009 թվականի ապրիլին Ուրալ Ռախիմովի կողմից «Բաշնեֆտը» «Սիստեմա» արդյունաբերական-ֆինանսական ընկերության կառույցներին վաճառելուն մասնակցելու մեջ:

Հետաքննության տվյալներով՝ Հայրապետյանն ունի կրկնակի քաղաքացիություն և ունեցվածք արտասահմանում: Մասնավորապես, վերջին ժամանակներս նա ապրել է Մոնակոյում: Հետաքննությունը հենց այս փաստով էր հիմնավորում նրան քննչական մեկուսարանում պահելու անհրաժեշտությունը: Հոկտեմբերի սկզբին գործարարին փոխադրել էին տնային կալանքի: Հայրապետյանի փաստաբանն ավելի վաղ հայտարարել է, որ իր պաշտպանյալի առողջական վիճակը խիստ վատացել է, և խնդրել է ազատել նրան:

Լուսանկարը` ТАСС