«Ոստիկանության քայլերգը»՝ ոստիկաններին (տեսանյութ)

Այս օրերին Երևանում է բոլոր ժամանակների երևելի արվեստագետներից մեկի՝ մեծն Արամ Խաչատրյանի որդին՝ Կարեն Խաչատրյանը:

Ապրիլի 16-ին Կարեն Խաչատրյանն այցելեց Պանթեոն, ծաղիկներ խոնարհեց մեծ հայի և կոմպոզիտորի շիրմին, ապա նրան հյուրընկալեց ոստիկանության պետ Վլադիմիր Գասպարյանը:

Այցի նպատակը բացառիկ էր, հուզիչ և, կարելի է ասել, պատմական. Կարեն Խաչատրյանը Հայաստանի ոստիկանությանը նվիրեց մեծ կոմպոզիտորի հեղինակած քայլերգը:

Ոստիկանության պետ Վլադիմիր Գասպարյանը երախտագիտություն հայտնելով թանկ պարգևի կապակցությամբ՝ կարևորեց քայլերգի նշանակությունը նորացող ոստիկանության համար:

Ջերմ ընդունելության և գնահատանքի համար շնորհակալական խոսքով հանդես եկավ Կարեն Խաչատրյանը և Վլադիմիր Գասպարյանին հանձնեց ոստիկանության քայլերգի նոտաները:

Հանդիպման ընթացքում ոստիկանության պետի հրամանով Կարեն Խաչատրյանը պարգևատրվեց «Համագործակցության ամրապնդման համար» մեդալով:

Վլադիմիր Գասպարյանի մեկ այլ հրամանով՝ ոստիկանության զինանշանը կրող ժամացույցով պարգևատրվեց ՀՀ նախագահի խորհրդական Արմեն Սմբատյանը:

Հյուրերին հանձնվեցին խորհրդանշական հուշանվերներ:

Իսկ հանդիսության ավարտին առաջին անգամ հնչեց Արամ Խաչատրյանի «Ոստիկանության քայլերգը»: