Դիլիջանի ռեստորանային համալիրի սրահներից մեկում թմրանյութ են հայտնաբերել

Ապրիլի 17-ին` ժամը 13.20-ին, ոստիկանության Դիլիջանի բաժնի ծառայողները Դիլիջան քաղաքի Կամոյի փողոցի թիվ 160 հասցեում գտնվող ռեստորանային համալիրի սրահներից մեկում կատարած զննությամբ հայտնաբերել են ապակյա տարա` 2 փոքր խծուծներով, չօգտագործված 1 ներարկիչ, օգտագործված 3 ներարկիչ` ասեղներով, և 1 ներարկիչ` ասեղով, որի մեջ առկա էր թափանցիկ հեղուկ, ապակյա 2 սրվակ` թափանցիկ հեղուկներով, «Ալկոհոլ փադ» գրառմամբ, չբացված 7 փաթեթ և բժշկական պարագաներ:

Սրահում գտնվող, 1981 թ. ծնված Արա Ս.-ն հայտարարել է, որ ներարկիչի մեջ լցվածը «կոկաին» թմրամիջոց է, մյուս 3 ներարկիչների մեջ նույնպես եղել է նույն թմրամիջոցից և ինքն ու սրահում գտնվող իր ընկերը` 1982 թ. ծնված Արա Հ.-ն, օգտագործել են ներարկվելու միջոցով:
Նույն օրը ոստիկանները նույն ռեստորանային համալիրի սենյակներից մեկից, թմրամիջոց պահելու կասկածանքով բերման են ենթարկել 1980 թ. ծնված Հայկ Հ.-ին:

Խուզարկությամբ նրա բաճկոնի գրպանից հայտնաբերվել է 2 փաթեթ, որոնցից մեկը 1,6 գ, մյուսը` 4,2 գ կանեփանման զանգվածներով:

Հայկ Հ.-ն հայտարարել է, որ հայտնաբերվածը «կանեփ» թմրամիջոց է, որը 2014 թ. հունիսին քաղել է Երևանի Աղյուսագործների փողոցի վերջնամասում գտնվող տարածքից, որի մի մասն օգտագործել է ծխելու միջոցով, իսկ մյուս մասը պահել է հետագայում օգտագործելու համար:

Նշանակվել են դատաքիմիական փորձաքննություններ:

Կատարվում է հետաքննություն: