Քաղաքացին կեղծ աշխատանքային պայմանագրեր է պատրաստել

Երևանի բնակիչ Աննա Վարդանյանին ՀՀ քրեական օրենսգրքի 325-րդ հոդվածի առաջին և երկրորդ մասերի հատկանիշներով մեղադրանք է առաջադրվել: Այս մասին հայտնի դարձավ դատական տեղեկատվական համակարգից:

Աննա Վարդանյանը Հնդկաստանի քաղաքացիներին կացության քարտ ձեռք բերելու հարցում օգնելու նպատակով նախնական համաձայնության է եկել Նարինե Սարգսյանի հետ, որից հետո Հնդկաստանի վեց քաղաքացու համար պատրաստել է իրավունք վերապահող կեղծ աշխատանքային պայմանագրեր:

Վերը նշված պայմանագրերից երկուսում չնշելով անգամ պայմանագրի կնքման ամսաթիվը' մեղադրյալը Նարինե Սարգսյանի գիտությամբ և համաձայնությամբ վերջինիս փոխարեն ստորագրել է դրանք: Այնուհետև Աննա Վարդանյանը կեղծ դիմումներ է ուղարկել ՀՀ ոստիկանության անձնագրային և վիզաների վարչություն, որի արդյունքում Հնդկաստանի վեց քաղաքացի ստացել են կեցության քարտեր:

Կեցության յուրաքանչյուր քարտի դիմաց Գուարավ Շարմանի միջոցով Աննա Վարդանյանը վերցրել է 40 հազար ՀՀ դրամ, որից 20 հազարը տվել է Նարինե Սարգսյանին, իսկ 5 հազարը' Գուարավ Շարմանին:

Վերը նշված քրեական հոդվածով մեղադրյալին սպառնում է առավելագույնը երկու տարի ժամկետով ուղղիչ աշխատանքներ կամ առավելագույնը չորս տարի ժամկետով ազատազրկում:

Կենտրոն և Նորք-Մարաշ վարչական շրջանների ընդհանուր իրավասության դատարանի դատավոր Գագիկ Պողոսյանն Աննա Վարդանյանի նկատմամբ որպես խափանման միջոց ընտրել է ստորագրություն չհեռանալու մասին: