Որտեղ է իրականությունը

Անցած շաբաթ Սյունիքում ծեծկռտուք է տեղի ունեցել, որը լայնորեն լուսաբանվեց ԶԼՄ-ների կողմից, քանի որ, ըստ շրջանառվող լուրերի, ծեծկռտուքի մասնակիցներից մեկը Սյունիքի մարզպետ Սուրիկ Խաչատրյանի որդին է եղել` Տիգրան Խաչատրյանը: Միջադեպի վերաբերյալ հարցին ի պատասխան Սյունիքի մարզպետ Սուրիկ Խաչատրյանը հերքեց ծեծկռտուքին իր որդու մասնակցության վերաբերյալ լուրը` նշելով, որ նա եղել է Երևանում: ՀՀ Քննչական կոմիտեն իր հերթին հաղորդագրություն տարածեց, որում նշված էր, որ «2015 թվականի մայիսի 2-ին՝ ժամը 16:00-ի սահմաններում, Հարութ Զաքարյանը Գորիս քաղաքի կենտրոնական մասում վիճաբանել է Տիգրան Խաչատրյանի հետ, որից հետո գնացել են Գորիսի «Սդղի գյոլ» կոչվող տարածք, որտեղ նրանց են միացել նաև այլ անձինք։ Վիճաբանությունը վերածվել է ծեծկռտուքի, որի ընթացքում Հարութ Զաքարյանին աչքի շրջանում պատճառվել է մարմնական վնասվածք»: Սակայն, պաշտոնապես չի հաստատվել, թե արդյոք վիճաբանողը մարզպետի որդին է:

Ասեմ, որ Սոնա Տռուզյանը «Ազատության» հետ զրույցում ասել էր, որ «քննություն է տարվում պարզելու նախ խուլիգանությանը մասնակից անձանց ինքնությունը, որից հետո նոր կհստակեցվի նրանցից յուրաքանչյուրի մասնակցության աստիճանը և ձեռք բերված ապացույցների հիման վրա կտրվի համապատասխան իրավական գնահատական»: Իսկ ահա տուժող Զաքարյանի հայրը «Ազատության» հետ զրույցում մանրամասն նկարագրել էր, թե ճանապարհին ընթացող մեքենայից պատահաբար թռած քարն է վնասել Հարութի աչքը:

Հետևաբար, իմ կարծիքով, իրականությունն իմանալու համար պետք է սպասել համապատասխան մարմինների իրավական և քննչական գործողությունների ավարտին, այլ ոչ թե ստանձնել վերոհիշյալ իրավապահ մարմինների պարտավորությունները և հանդես գալ հապճեպ հայտարարություններով:

Արսեն Բաղդասարյանի ֆեյսբուքյան էջից