Հայաստանում մանկական մարմնավաճառության ու պոռնկագրության մակարդակը ցածր է

Հայաստանում մանկական մարմնավաճառությունն ու պորնոգրաֆիան մակարդակը ավելի ցածր է, քան Հայաստանի նման բնակչության թվաքանակ ունեցող երկրներում: Այս մասին մայիսի 18-ի ասուլիսին նշեց Միավորված ազգերի կազմակերպության հատուկ զեկուցող Մոդ դե Բյոր-Բուքիքիոն, ով 2015թ. մայիսի 12-18 պաշտոնական այցով Հայաստանում էր՝ գնահատելու երկրում երեխաների վաճառքի, մարմնավաճառության և պոռնկագրությանն առնչվող իրավիճակը:

«Հայաստանում երեխաների նկատմամբ բռնությունների մակարդակը ցածր է, սակայն երեխաները շարունակում են պաշտպանության կարիք ունենալ: Հայտնի է, որ Հայաստանում եզդիների և որոշ այլ համայնքներում անչափահասների վաղ ամուսնությունը սովորական բնույթ է կրում, սակայն, ի ուրախություն բոլորիս, Հայաստանի կառավարությունը բռնել է օրենսդրական փոփոխությունների ճանախարհը, որոնց շնորհիվ ՀՀ օրենսդրությամբ՝ պատանիների ամուսնությունների տարիքը բարձրացվի մինչև 18 տարեկան, այն դեպքում, երբ ներկա պահին գործող օրենքը թույլ է տալիս կատարել բացառություններ», - հայտնեց Մոդ դե Բյոր-Բուքիքիոն:

Խոսելով երեխաների պաշտպանվածության մակարդակի բարձրացման անհրաժեշտության մասին՝ փորձագետը հավելեց, Հայաստանում անհրաժեշտ է ապահովել երեխաների պաշտպանությունը համացանցում ազատ հասանելի տարաբնույթ վտանգավոր և սեքսուալ շահագործման բնույթ կրող ռեսուրսներից:

«Կոչ եմ անում Հայաստանի կառավարությանը համագործակցել տեղեկատվական տեխնոլոգիաներով զբաղվող ընկերությունների և ՀԿ-ների հետ՝ թվային ուսուցման ծրագրերի ոլորտում, որոնք ուղղված կլինեն ոչ միայն երեխաների, այլ նաև ծնողների կողմից երեխաներին թվային ոլորտում անվտանգությունը ապահեվոլուն»,- ասաց Մոդ դե Բյոր-Բուքիքիոն:

Իր յոթօրյա առաքելության ընթացքում մարդու իրավունքների փորձագետը հանդիպել է գործադիր, օրենսդիր և դատական իշխանության ներկայացուցիչների հետ ազգային և տեղական մակարդակներով: Նա նաև հանդիպել է երեխաների պաշտպանության հարցերով զբաղվող քաղաքացիական հասարակության անդամների և ՀԿ-ների հետ, ինչպես նաև այցելել երեխաների խնամքի կենտրոններ և ապաստարաններ Երևանում, Վանաձորում և Գյումրիում: