Դատախազը պարզաբանեց. ոչ թե «վայրագություն», այլ ֆիզիկական ուժի կիրառում

Ազգային ժողովում ՀԱԿ խմբակցության պատգամավոր Արամ Մանուկյանն այսօր ՀՀ գլխավոր դատախազին հարց ուղղեց նախագահականի մոտ բռնության ենթարկված՝ բանակում մահացած զինծառայողների ծնողների վերաբերյալ:

Պատգամավորը կատարվածը վայրագություն կոչեց և դատախազից հետաքրքրվեց, թե ի՞նչ վերաբերմունք ունի:

«Իրականում մեր հասարակության մեջ այնպիսի տպավորություն է ստեղծվել, որ եթե ոստիկանը ուժ է կիրառում՝ արդեն հանցագործություն է: Այդպես չէ: Ոստիկանն ինչպես մեր երկրում, այնպես էլ աշխարհի ցանկացած երկրում, այն եզակի մարմիններից մեկն է, որ օրենքով մանդատ ունի ուժ կիրառելու: Այլ հարց է, որ մենք պետք է քննարկենք՝ արդյո՞ք այդ ուժը կիրառվել է համաչափ, կիրառվել է անհրաժեշտ, և ամենակարևորը, ոստիկանության մասին օրենքը հստակ սահմանում է ֆիզիկական ուժ կիրառելու դեպքերը: Կան իրավիճակներ, երբ ոստիկանի կողմից ուժի չկիրառումը կարող է հանգեցնել հենց ոստիկանի նկատմամբ պատասխանատվության միջոցներ կիրառելուն»,- ասաց Գևորգ Կոստանյանը:

Օրենքից դրույթ մեջբերելով՝ դատախազը հիշեցրեց նաև, որ Հանրապետության նախագահի նստավայրի, Ազգային ժողովի, կառավարության, դատարանների, ՔՀԿ-ների մոտ արգելվում է որոշակի տարածությամբ հանրահավաքներ կազմակերպել: 

Իսկ ինչ վերաբերում էր «վայրագություն» բառին՝ դատախազն ասաց. «Ինչ անուն ուզում եք դրեք, իրավունքի տեսակետից դա կոչվում է ֆիզիկական ուժի կիրառում»: