Ճանապարհային ոստիկանությունը հորդորում է «Վերջին զանգի» օրը ողջամիտ լինել

ՀՀ ճանապարհային ոստիկանությունը մայիսի 22-ից մինչ դպրոցական քննական շրջանի ավարտը ուժեղացված հսկողություն է իրականացնելու ավագ դպրոցների մոտակա փողոցներում և «Վերջին զանգ»-ի հանդիսությունների անցկացման վայրերի հարակից տարածքներում: Լրագրողների հետ մայիսի 20-ին կայացած հանդիպմանը այս մասին հայտնեց ՀՀ ճանապարհային ոստիկանության ճանապարհապարեկային ծառայության բաժնի պետ, ոստիկանության գնդապետ Նորիկ Սարգսյանը: «ՀՀ ոստիկանապետի հանձնարարականով այս տարի նույնպես ավելի շուտ ենք սկսել «Վերջին զանգ»-ի հանդիսությունների անվտանգությունն ապահովելուն ուղղված՝ Ճանապարհային ոստիկանության ձեռնարկվելիք միջոցառումների նախապատրաստական աշխատանքները, որոնք տարվել են և Երևանի, և մարզերի ավագ դպրոցներում: Ճանապարհային ոստիկանության ծառայողների, համայնքային ոստիկանների և անչափահասների գործերով տեսուչների ջանքերով հանդիպումներ են կազմակերպվել գրեթե բոլոր ավագ դպրոցների աշակերտների, նրանց ծնողների և մանկավարժական կոլեկտիվների հետ»,- «Արմենպրես»-ի հաղորդմամբ' տեղեկացրեց նա' հույս հայտնելով, որ կազմակերպված հանդիպումները լիովին կծառայեն իրենց նպատակին:

Նա նշեց, որ չնայած Ճանապարհային ոստիկանության ամենամյա հորդորներին, «Վերջին զանգ»-ի հանդիսությունների օրն իրենք հայտնաբերում ենք դեպքեր, երբ երեխան է վարում ավտոմեքենան, ինչը շատ վտանգավոր է: «Նախորդ տարի մենք արձանագրել ենք 86 այդպիսի դեպք, և բոլոր այդ ավտոտրանսպորտային միջոցները տարվել են ճանապարհային ոստիկանության հատուկ պահպանվող տարածքներ և բաց են թողնվել միայն հաջորդ օրերին' վարչական ներգործության միջոցներ ձեռնարկելուց հետո»,- շեշտեց Նորիկ Սարգսյանը:

Նա հավելեց նաև, որ 2014թ.-ին կատարված աշխատանքների շնորհիվ' այդ տարվա «Վերջին զանգ»-ի հանդիսությունների օրն անցել է առանց շրջանավարտների մասնակցության ճանապարհատրանսպորտային պատահարների: «Դժբախտ դեպքերից խուսափելու համար ես կրկին հորդորում և պահանջում եմ շրջանավարտների ծնողներից և հարազատներից՝ թույլ չտալ երեխաներին նստել ավտոմեքենաների ղեկին, հակառակ դեպքում՝ կկիրառվեն օրենքով նախատեսված ամենախիստ գործողությունները (ՀՀ Վարչական իրավախախտումների օրենսգրքի համաձայն՝ անչափահաս անձի կողմից ավտոմեքենայի վարման դեպքի համար տուգանքը 20 հազար ՀՀ դրամ է, իսկ ավտոմեքենայի ղեկը անչափահասին վստահող անձը տուգանվում է 10 հազար ՀՀ դրամով):