Կորյուն Նահապետյանը կարևորում է դատախազության դերը հանցավորության դեմ պայքարի և արդարադատության հարցում

Ազգային ժողովի ՀՀԿ խմբակցության պատգամավոր Կորյուն Նահապետյանը հանցագործության դեմ պայքարում միասնական քաղաքականության անհրաժեշտություն է տեսնում: ՀՀ գլխավոր դատախազության 20014թ. գործունեության վերաբերյալ հաղորդման քննարկման ընթացքում Կորյուն Նահապետյանը կարևորեց հանցագործության դեմ պայքարի, հանցավորությունների կանխման, արդյունավետ հետաքննության շրջանակում գլխավոր դատախազության դերն ու պատասխանատվությունը: «Ես ցանկանում եմ հատուկ ընդգծել պատասխանատվության խնդիրը, որովհետև իրավապահ համակարգի համար շատ կարևոր է հատկապես միջդատավարական վարույթում հստակեցնել յուրաքանչյուր օղակի պատասխանատվությունն ու դերակատարումը՝ դրանով պայմանավորված նաև նրանց գործառույթները, որովհետև առանց հստակության ունենալու ենք այն վիճակը, որն այսօր ունենք: Իսկ այդ վիճակի գնահատականը հետևյալն է՝ մենք համապատասխան մարմինների մոտ ունենք անառողջ մրցակցության որոշակի տարրեր, ինչի համար կան օբյեկտիվ և սուբյեկտիվ պատճառներ: Բայց Ազգային ժողովը պետք է նաև անդրադարձ կատարի այդ իրավիճակին և ձեռնարկի նոր քայլեր, որպեսզի մենք հանցավորության դեմ պայքարում ունենանք միասնական քաղաքականություն, միասնական ռազմավարություն և բոլոր իրավապահ մարմինների՝ այդ թվում նաև դատախազության գործունեությունը նպատակաուղղենք առավել բարձր նպատակների հասնելուն»,- «Արմենպրես»-ի հաղորդմամբ՝ նշեց պատգամավորը:

Նահապետյանը նկատեց, որ գլխավոր դատախազը հաղորդման մեջ առանձնացրել է մի նոր մոտեցում, որի կապակցությամբ արդեն իսկ մշակվել է համապատասխան օրենքի նախագիծ: «Խոսքը հանցավորության դեմ պայքարում իրավապահ մարմինների գործունեության համակարգման գործառույթի մասին է: Առաջարկվում է դատախազության համակարգին վերապահել նման գործառույթ, որը Խորհրդային ժամանակներում դատախազությունն ունեցել է: Ես դրանում որոշակի վտանգ եմ տեսնում, որն առավելապես խորացնելու է այն լարվածությունը, որը մենք ունենք իրավապահ համակարգում: Մենք պետք է կարողանանք հստակ առանձնացնել՝ ով ինչի համար է պատասխանատու»,- ասաց պատգամավորը:

Պատգամավորը կարևորագույն խնդիր համարեց հետաքննության ընթացքում դրա բազմակողմանիությունը, թափանցիկությունը և արդյունավետությունը, որի համար պատասխանատվությունը դրված է դատախազության վրա: Կորյուն Նահապետյանը չհամաձայնեց ՀՀ գլխավոր դատախազի այն մտքի հետ, թե միայն ցուցումներ և հանձնարարականներ տալով հնարավոր չէ ապահովել հետաքննության և նախաքննության օրինականությունը: Նա շեշտեց, որ նախաքննության և հետաքննության օրինականության ապահովման պատասխանատվությունը դրված է դատախազության վրա, որը պետք է ներդնի ներքին այնպիսի մեխանիզմներ և ընթացակարգեր, որպեսզի հնարավոր լինի պատշաճ կերպով իրականացնել այդ պատասխանատվությունը:

Պատգամավորը կարևորեց նաև երկրում արդարադատության ողջ գործընթացում դատախազության դերը: Նա նշեց, որ այս առումով հասարակությունը դատախազությունից շատ մեծ ակնկալիքներ ունի: Նա կոչ արեց երկրում արդարադատության ոչ պատշաճ մակարդակի համար մեղադրել միայն դատարաններին՝ այստեղ կարևորելով նաև դատախազության դերը:

Նահապետյանը չհամաձայնեց տեսակետներին, թե երկրում կա արդարադատության բավարար մակարդակ, ինչը համարժեք չի ընկալվում հասարակության կողմից: Նա համաձայն է, որ կան նաև ոչ համարժեք ընկալման դեպքեր, սակայն գտնում է, որ դատախազությունը դեռևս շատ անելիքներ ունի, որպեսզի արդարադատության նկատմամբ հասարակության վստահությունը շահելով՝ հնարավոր լինի հասնել լուրջ հաջողությունների: