Իրանի քաղաքացին փորձել է խոշոր չափերի թմրամիջոց իրացնել Հայաստանում

Իրանի Իսլամական Հանրապետության քաղաքացի Մահդի Ալիակբարի Սադեղիսումեիոլյանին ՀՀ քրեական օրենսգրքի 215-րդ հոդվածի երկրորդ մասի և 266-րդ հոդվածի երրորդ մասի երկրորդ կետի հատկանիշներով մեղադրանքներ են առաջադրվել: Այս մասին մեզ հայտնի դարձավ դատական տեղեկատվական համակարգից:

Մահդի Ալիակբարի Սադեղիսումեիոլյանին, նպատակ ունենալով ԻԻՀ-ից Հայաստանի Հանրապետության տարածքով, տարանցիկ ճանապարհով տեղափոխել և իրացնել խոշոր չափերի թմրամիջոցի խմբաքանակ, 2014թվականին հոկտեմբերի 24-ին ժամանել էր Հայաստան:

Այնուհետև' նա «Մեղրի» մաքսակետով իր ճամպրուկի հատակային մասում նախապես պատրաստված թաքստոցում տեղափոխել է առանձնապես խոշոր չափերի' 1 կիլոգրամ 641.14 գրամ ընդհանուր քաշով «Մեթամֆետամին» տեսակի թմրամիջոց, որն ապօրինի պահել է Երևանի Երվանդ Քոչարի փողոցի 6-րդ շենքում գտնվող «Բելլա» հյուրանոցում վարձակալած իր սենյակում:

Վերը նշված քրեական հոդվածներով' մեղադրյալին սպառնում է չորսից տասնհինգ տարի ժամկետով ազատազրկում' գույքի բռնագրավմամբ կամ առանց դրա:

Մահդի Ալիակբարի Սադեղիսումեիոլյանը կալանավորված է: Քրեական գործը քննվելու է Կենտրոն և Նորք-Մարաշ վարչական շրջանների ընդհանուր իրավասության դատարանում: