Քաղաքապետարանի պաշտոնյայի «բեսպրեդելը» (լուսանկարներ)

Պետական իշխանության մեծ ու փոքր կալիբրի պաշտոնյաների կողմից իրականացվող «բեսպրեդելը» հայաստանյան դժգույն իրականության բաղկացուցիչ մասն է կազմում, ինչի մասին ներկայացվում է գրեթե ամեն օր։ Հերթական դեպքի մասին ԼՈՒՐԵՐ.com–ին տեղեկացրին խմբագրություն այցելած քաղաքացիները։

Երևանի Կիրովի անվան մանկական այգում իրենց հանգիստն են անցկացնում ոչ միայն այգու շրջակա բնակելի շենքերի, այլ նաև մյուս համայնքների բնակիչները։ Երեկ՝ հուլիսի 15-ին, այցելուները նկատել են զբոսայգում՝ հենց ճեմուղու վրա, կայանված «Մերսեդես» մակնիշի ավտոմեքենա՝ 15 ՍՍ 005 համարանիշներով։ Երբ մեր համաքաղաքացիները բարձրաձայնել են կարգազանցության մասին և դիմել Կիրովի անվան մանկական այգու տնօրեն Ստեփան Մինասյանին, վերջինս հայտարարել է, որ ինքն անձամբ է թույլատրել, որ մեքենայի սեփականատերն այն կայանի հենց այդտեղ։ «Ես եմ թույլ տվել, ու մեքենան պետքա կանգնի ստեղ»,- ասել է Մինասյանը։

Ավելի ուշ պարզ է դարձել, որ տվյալ մեքենան պատկանում է Երևանի քաղաքապետարանի աշխատակազմի բնապահպանության վարչության պետ Ավետ Մարտիրոսյանին, մի պաշտոնյայի, ով ինքն է պատասխանատու նմանատիպ կարգազանցների կարգի հրավիրելու համար։ Նա իր հրապարակային ելույթներից մեկում բառացի հայտարարել է հետևյալը. «Այս տարի մոտ 3 անգամ կավելանան մայրաքաղաքի կանաչ տարածքները: Սա Երևանի քաղաքապետի որդեգրած սկզբունքն է և ընդգրկելու է բոլոր վարչական շրջանները: Մենք անելու ենք ամեն ինչ, որպեսզի Երևանը բոլոր համար դառնա հանգստի հաճելի գոտի»։ Սակայն, իրականում այս նույն պաշտոնյան անում է ճիշտ հակառակը՝ խախտելով իր իսկ կողմից ղեկավարվող վարչության կանոնադրությունը։

Պետք է նշել նաև, որ լուսանկարներում պատկերված մեքենայի արժեքը մոտավորապես 50-55 հազար ԱՄՆ դոլարին համարժեք դրամ է, ինչը, պարզից էլ պարզ է, որ գնված չէ աշխատավարձով:

Երևանի քաղաքապետ Տարոն Մարգարյանը միշտ փորձում է դրական օրինակ ծառայել իր ենթակաների համար, սակայն, փաստորեն, վերջինների շարքում այդքան էլ չեն հետևում իրենց ղեկավարի օրինակին։ Կամ գուցե քանի Տարոն Մարգարյանը պաշտոնական այցով Մարսելում է նրա ենթակաները որոշել են քաղաքի կարգուկանոնը յուրովի փոխե՞լ։

Մնում է միայն հիշեցնել մեր կարգազանց պաշտոնյաներին այն մասին, որ Երևանն իրենք իրենց պապերից ժառանգություն չեն ստացել, որ վարվեն մայրաքաղաքի հետ ինչպես խելքներին փչի, և երբևէ չկարծեն, թե անպատժելի են։