Բագրատաշենի մաքսակետի պետի տեղակալի նկատմամբ խափանման միջոց է ընտրվել կալանավորումը

Երևանի բնակիչ Արտուշ Ղուլյանին ՀՀ քրեական օրենսգրքի 311-րդ հոդվածի չորրորդ մասի երկրորդ կետի հատկանիշներով մեղադրանք է առաջադրվել:

Արտուշ Ղուլյանը որպես մաքսակետի պետի տեղակալ (2006 թվականի մայիսի 9-ից) աշխատելով ՀՀ ԿԱ մաքսային պետական կոմիտեի Գուգարքի տարածաշրջանային մաքսատան Բագրատաշենի մաքսակետում' դրամի ձևով ստացել է առանձնապես խոշոր չափի կաշառք' կաշառք տվողի օգտին իր լիազորությունների շրջանակում գործողություն կատարելու համար:

Վերը նշված քրեական հոդվածով' մեղադրյալին սպառնում է յոթից տասներկու տարի ժամկետով ազատազրկում՝ գույքի բռնագրավմամբ կամ առանց դրա:

Բերդի ընդհանուր իրավասության դատարանի դատավոր Զոյա Զաքինյանն Արտուշ Ղուլյանի նկատմամբ, որպես խափանման միջոց, ընտրել է կալանավորումը: