Պերմյակովի պատժի կրման վայրը դեռ հստակ չէ. Կոստանյան

Գյումրիում Ավետիսյանների յոթ հոգանոց ընտանիքի սպանության մեջ մեղադրվող ռուս զինծառայող Վալերի Պերմյակովի պատժի կրման վայրի մասին կարելի է խոսել դատավճռի օրինական ուժի մեջ մտնելուց հետո: Այս մասին «Արմենպրես»-ի հետ զրույցում նշեց ՀՀ գլխավոր դատախազ Գևորգ Կոստանյանը՝ մեկնաբանելով, որ այն տեղեկությունները, թե ՀՀ և ՌԴ դատախազություններն արդեն պայմանավորվել են, որ դատավարության ավարտից հետո Պերմյակովն իր պատիժը կկրի Հայաստանի քրեակատարողական հիմնարկներից մեկում: «Ես բազմիցս առիթ ունեցել եմ ասելու, որ նախաքննության և դատավարության արդյունքներից հետո մենք կունենանք այլ կարգավիճակ' դատապարտյալ, որը այլ երկրի քաղաքացի է և միայն դատավճռի օրինական ուժ ստանալուց հետո մենք կարող ենք քննարկել դատապարտյալի փոխանցման, պատիժը կրելու վայրի հետ կապված, որը պայմանավորված է տարբեր կոնվենցիոն դրույթներով, որից հետո մենք կքննարկենք՝ արդյոք Վալեր ի Պերմյակովն իր պատիժը կկրի այստե՞ղ, թե՞ այլ վայրում»,- նշեց Կոստանյանը:

Հայկական կողմում դատավարության ժամկետների վերաբերյալ Գլխավոր դատախազը չցանկացավ որևէ կանխատեսում անել, քանի որ դա կախված է նախաքննության ընթացքից: Հնարավոր է' այն լինի այս տարի, հնարավոր է, որ ոչ:

Ավետիսյանների ընտանիքի 6 անդամի սպանությունը տեղի է ունեցել 2015 թվականի հունվարի 12-ին՝ վաղ առավոտյան, ժամը 06:00-ի սահմաններում, նրանց մահը վրա է հասել հրազենային վնասվածքներից։ Ավետիսյանների ընտանիքից ողջ էր մնացել 6 ամսական փոքրիկը՝ Սերյոժա Արմենի Ավետիսյանը, ով կտրող-ծակող գործիքից ստացած վնասվածքներով տեղափոխվել էր բժշկական կենտրոն, այնուհետև' յոթ օր հետո մահացել: Նշանակվել էին դատաբժշկական, դատատոքսիկոքիմիական, դատաձգաբանական փորձաքննություններ: Կասկածյալին ռուս սահմանապահները հայտնաբերել են հայ-թուրքական սահմանը հատելու փորձ կատարելիս և հանձնել 102-րդ ռուսական բազայի հրամանատարությանը:

Քրեական գործը հարուցվել է ՀՀ քրեական օրենսգրքի 104-րդ հոդվածի 2-րդ մասի 1-ին կետով (երկու և ավելի անձանց սպանությունը): Վալերի Պերմյակովին քրեական գործով որպես մեղադրյալ ներգրավելու մասին, և ՀՀ քննչական կոմիտեի քննիչները Վալերի Պերմյակովին մեղադրանք են առաջադրել Հայաստանի Հանրապետության քրեական օրենսգրքի 104-րդ հոդվածի 2-րդ մասի 1-ին կետով՝ երկու և ավելի անձանց դիտավորյալ սպանության համար: Վալերի Պերմյակովն ընդունել է առաջադրված մեղադրանքը: Ռուսական կողմում հարուցված քրեական գործով Պերմյակովը դասալքության և զենքի ապօրինի կրման համար օգոստոսի 12-ին դատապարտվել է 10 տարվա ազատազրկման: