Միջազգային իրավունքը տեղեկատվության աղբյուրը բացահայտելու երեք դեպք է նախատեսում

Իրավաբաններ Արտակ Զեյնալյանը և Արա Ղազարյանը ներկայացրեցին միջազգային իրավունքի այն սկզբունքները, որոնցով առաջնորդվել են Սահմանադրական դատարանում տեղեկատվական աղբյուրի բացահայտմանն առնչվող հայցը ձևակերպելիս:

«Լրագրողին կարող են ստիպել բացահայտել տեղեկատվական աղբյուրը երեք դեպքում' առաջին երկուսը վերաբերվում են դեռևս չկատարված հանցագործությունը կանխելուն, երրորդը' բացառապես ծանր հանցագործության մեջ մեղադրվող անձին արդարացնելու համար: Իսկ արդեն կատարված, ավարտված հանցագործությունը կամ ենթադրյալ հանցագործությունը բացահայտելու համար տեղեկատվության աղբյուրը չի կարելի բացահայտել»,- «Արմենպրես»-ի հաղորդմամբ' լրագրողների հետ զրույցում հայտնեց իրավաբան Արտակ Զեյնալյանը՝ հավելելով, որ գործող օրենքի կիրառության եղանակը հակասահմանադրական է այնքանով, որքանով որ չկան անհրաժեշտ կառուցակարգեր, որոնք կապահովեն որոշակիություն լրագրողների համար:

Իր հերթին իրավաբան Արա Ղազարյանը նկատեց, որ լրագրողին կարող են ստիպել բացահայտել տեղեկատվության աղբյուրը, եթե առկա է ծանր հանցագործություն: «Ծանր հանցագործությունն էլ, իմ կարծիքով, այնպիսի ծանր հանցագործություն պետք է լինի, ինչպիսին ահաբեկչական գործողությունն է, և երբ բոլոր միջոցներն իսկապես սպառվել են, որպես ծայրահեղ միջոց նոր միայն կարելի է լրագրողին պահանջել բացահայտել իր աղբյուրը»,- շեշտեց նա՝ հավելելով, որ վերջին շրջանում քննիչները հաճախակի են լրագրողին գործով որպես վկա հրավիրում հարցաքննության: «Այնպիսի տպավորություն է, որ լրագրողը դառնում է գործակալ: Երեկ մի լրագրող էլ ասաց, որ իրեն էլ են հրավիրել, որ պատմի, թե որտեղից իրեն այդ տեղեկատվությունը, ինչը ժողովրդավարական սկզբունքներին դեմ է»,- ընդգծեց Ղազարյանը:

ՀՀ Սահմանադրական դատարանը հոկտեմբերի 20-ին գրավոր ընթացակարգով քննության առավ «Հրապարակ. օրաթերթ» ՍՊԸ-ի և «Ստարտ Մեդիա» ՍՊԸ-ի դիմումների հիման վրա' «Զանգվածային լրատվության մասին» ՀՀ օրենքի 5-րդ հոդվածի 2-րդ մասի, «ՀՀ քրեական դատավարության օրենսգրքի 14-րդ հոդվածի երկրորդ մասի, 41-րդ հոդվածի 2-րդ մասի 1-ին կետի, 279-րդ հոդվածի' Հայաստանի Հանրապետության Սահմանանդրությանը համապատասխանության հարցը որոշելու վերաբերյալ գործը. համապատասխան հայցը Սահմանադրական դատարան ներկայացրել են իրավաբաններ Արտակ Զեյնալյանը և Արա Ղազարյանը: