Դիմակավորված անձանց «նալյոտ» «Նուրբարաշեն» ՔԿՀ-ում. ԱՆ ՔԿՎ-ն հերքում է

Իրավապաշտպան Ժաննա Ալեքսանյանը Facebook-յան իր էջում երեկ գիշեր գրել էր. ««Նուբարաշեն» ՔԿՀ-ում այսօր տեղի ունեցած «նալյոտ» կոչվող վայրագությունը ցնցել է անգամ բանտում երկար տարիներ աշխատող հսկիչներին, թե ինչպես են անսպասելիորեն գեներալ մայոր Արթուր Օսիկյանի ղեկավարած վարչության աշխատակիցները դիմակավորված հարձակվել փակված անպաշտպան մարդկանց վրա, ջարդել նրանց ու քարուքանդ արել խցերը: Կալանավորներն ասում են, որ այսպիսի բան բանտում տեղի չէր ունեցել 2000թ-ից ի վեր: Ընդ որում, հարձակումը կրկնվել է երկու անգամ: Դե պատկերացրեք բանտարկյալների հոգեբանական վիճակը և այն մայրերի, որոնք ահաբեկված և խելագարված զանգահարում էին՝ չիմանալով ինչպես պաշտպանել իրենց զավակներին»:

Արդարդատության նախարարության քրեակատարողական վարչությունը հերքում է տարածվող տեղեկությունները.

«Տեղեկությունը իրականությանը չի համապատասխանում»,- ԼՈՒՐԵՐ.com-ի հետ զրույցում ասաց ԱՆ ՔԿՎ տեղեկատվության և հասարակայնության հետ կապերի վարչության պետ Գոռ Ղլեչյանը:

ՀՀ ԱՆ քրեակատարողական վարչության պետ, գեներալ-մայոր Արթուր Օսիկյանը ևս հերքել է տեղի ունեցածը:

«Տեղեկացնում ենք, որ ԶԼՄ-ներում տեղ գտած տարաբնույթ տեղեկությունները ծառայողական քննության շրջանակներում իրականացված գործողությունների, մասնավորապես՝ ազատազրկված անձանց նկատմամբ կատարված բռնությունների վերաբերյալ իրականությանը չեն համապատասխանում: Հայտնում ենք, որ քաղաքացու դիմումի հիման վրա նշանակված ծառայողական քննության շրջանակներում ՀՀ ԱՆ ՔԿՎ ներքին անվտանգության բաժնի աշխատակիցների կողմից խուզարկություն է կատարվել ՀՀ ԱՆ «Նուբարաշեն» ՔԿ հիմնարկի խցերում, որտեղից հայտնաբերվել և առգրավվել են մի շարք արգելված իրեր, ինչն էլ բնականաբար կարող էր առաջացնել դատապարտյալի կամ կալանավորված անձի դժգոհությունը»,- ասվում է ՀՀ ԱՆ ՔԿՎ հանրային կապերի բաժնի պարզաբանման մեջ: