Արմավիրում քաղաքացին կրակոցներ է արձակել իր մոտ ապօրինի պահվող ատրճանակից

Արմավիր քաղաքում քաղաքացի Սամվել Հ.-ն 2014 թվականի ապրիլի 24-ին կենցաղային հարցի շուրջ վիճաբանել է համաքաղաքացի Օհան Հ.-ի և վերջինիս ընկերների հետ: Սամվել Հ.-ն խուլիգանություն կատարելու դիտավորությամբ, կոպիտ կերպով խախտելով հասարակական կարգը, հավաքված քաղաքացիների ներկայությամբ Օհան Հ.-ի հասցեին հայհոյանքներ է հնչեցրել: Այնուհետև Սամվել Հ.-ն, բացահայտ անհարգալից վերաբերմունք դրսևորելով հասարակության նկատմամբ, իր մոտ ապօրինի պահվող ատրճանակից կրակոց է արձակել:

Ինչպես տեղեկացնում են ՀՔԾ լրատվական ծառայությունից, փաստի առթիվ ՀՀ ոստիկանության նախկին քննչական գլխավոր վարչության Արմավիրի քննչական բաժնում հարուցվել է քրեական գործ: Տևական ժամանակ կատարված նախաքննության ընթացքում Սամվել Հ.-ին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով, նրա նկատմամբ հայտարարվել է հետախուզում, իսկ քրեական գործով վարույթը կասեցվել է: Հետագայում գործի փաստական հանգամանքներով պայմանավորված՝ լրիվ, օբյե կտիվ և բազմակողմանի քննությունը երաշխավորելու անհրաժեշտությունից ելնելով՝ ՀՀ գլխավոր դատախազի կողմից քրեական գործը քննության է ուղարկվել ՀՀ հատուկ քննչական ծառայություն:

ՀՀ հատուկ քննչական ծառայություն ուղարկված հիշյալ քրեական գործով վարույթը վերսկսվել է, քանի որ տևական ժամանակ հետախուզման մեջ գտնվող, գործով մեղադրյալ Սամվել Հ.-ն ներկայացել է: Նախաքննությունը շարունակվում է: