Հանրաքվեի վերաբերյալ Գլխավոր դատախազություն ստացված 461 հաղորդումից 14-ով քրգործ է հարուցվել. Գևորգ Կոստանյան

ՀՀ սահմանադրության փոփոխությունների հանրաքվեի ընթացքի վերաբերյալ ՀՀ գլխավոր դատախազություն է ստացվել հանցագործության մասին 461 հաղորդում: Այս մասին այսօր լրագրողների հետ հանդիպմանն ասաց ՀՀ գլխավոր դատախազ Գևորգ Կոստանյանը՝ նշելով, որ դրանցից 300-ը զանգվածային լրատվական միջոցների կողմից հրապարակումներն են, որոնք իրենք շուրջօրյա աշխատանքի միջոցով հավաքագրել են և այնուհետև բաշխվել ՀՀ ոստիկանություն, Քննչական կոմիտե, Հատուկ քննչական ծառայություն:

«Հանրապետության տարածքում 461 հաղորդումներից 189-ի մասով այս պահի դրությամբ քրեական գործի հարցումը մերժելու որոշում է կայացվել, իսկ 14-ի մասով քրեական գործ է հարուցվել»,- ասաց Գևորգ Կոստանյանը:

«Հաշվի առնելով, որ սահմանադրության փոփոխությունները երկրի համար կենսական նշանակություն ունեն և ապահովագրում ու երաշխավորում են հետագա սերնդի ու ամբողջ երկրի ապագայի հարցերը' իրավապահ համակարգը, այդ թվում' Գլխավոր դատախազությունը ձեռնարկել ու ձեռնարկում է բոլոր միջոցները հանցագործներին հայտնաբերելու ու մեղավորներին պատասխանատվության ենթարկելու հարցում»,- ասաց Գևորգ Կոստանյանը:

Նրա խոսքով՝ նոյեմբերի 30-ին Գլխավոր դատախազությունում ստեղծվել էր աշխատանքային խումբ, որը կոորդինացնում էր ինչպես մինչև քվեարկությունը, այնպես էլ քվեարկությունից հետո դատախազական ամբողջ կորպուսի աշխատանքը: Գլխավոր դատախազը հավելեց, որ հանրաքվեի օրը ողջ դատախազական կազմն աշխատել է ու գրանցել ահազանգեր, հանցագործության մասին հաղորդումներ, ԶԼՄ-ների հրապարակումներ: