Գյումրիում Պերմյակովի գործով դատական նիստը հետաձգվեց մինչև հունվարի 18-ը

Գյումրիում Ավետիսյանների ընտանիքի անդամների սպանության մեջ մեղադրվող ռուս զինծառայող Վալերի Պերմյակովի գործով դատական նիստը հետաձգվեց մինչև հունվարի 18-ը' ժամը 12:00-ն: Միջնորդությունը ներկայացրել էր հանրային երկու պաշտպաններից մեկը' Էդուարդ Աղաջանյանը: Նա ցանկանում է ծանոթանալ գործի նյութերին' 26 հատոր: Դատարանը բավարարեց նրա միջնորդությունը և նրան մեկ ամիս ժամանակ տվեց նյութերին ծանոթանալու համար: Պերմյակովը հանրային երկու պաշտպան ունի: Մյուս պաշտպանը' Արմեն Պողոսյանը, դեկտեմբերի 30-ից հետո չի ներկայացնի Պերմյակովի շահերը:

Դատական նիստերի անցկացման վայրի առնչությամբ առաջին նիստի ընթացքում կային դժգոհություններ, որոնք ներկայացրեցին Ավետիսյանների իրավահաջորդների շահերի պաշտպանները:

Դատական նիստին իրավապաշտպան Արթուր Սաքունցը հայտարարեց, որ ոուսական համազգեստով անձանց ներկայությունը դահլիճում նրան անհանգստություն է պատճառում և առաջարկեց նրանց հեռացնել նիստերի դահլիճից: Առաջարկից հետո նիստն ընդմիջվեց 15 րոպեով: Վերսկսվելուց հետո, սակայն, դատարանը մերժեց միջնորդությունը:

Ավետիսյանների իրավահաջորդները դատական նիստում բացահայտումներ արեցին Պերմյակովի «սատանիստ» լինելու վերաբերյալ: Նրանք ռուսական 102-րդ դատարանում ընթացող դատական առաջին նիստում հայտարարեցին, որ «Օդնոկլասսնիկի» սոցիալական ցանցում 2013թ. «սատանիստների» խումբ է ձևավորվել և Պերմյակովն անդամակցել է այդ խմբին: Սպանելով ընտանիքի մի քանի անդամներին՝ Պերմյակովը, փաստաբանների համոզմամբ, իր ««տիրոջն» է «հանձնել» մի քանի տղամարդու և մի քանի կնոջ», որի մասին ավելի վաղ գրություն էր կատարել հիշյալ խմբում: Փաստ աբանները պնդում են, որ դա կարևոր հանգամանք է' հանցագործության դրդապատճառները հասկանալու համար:

Գործը Շիրակի մարզի ընդհանուր իրավասության դատարանում' դատավոր Հարություն Մովսեսյանի վարույթում է: Պերմյակովը դատական նիստերի դահլիճ էր բերվել ռուս զինծառայողների ուղեկցությամբ: Նիստը դռնբաց էր, մասնակցում էին Ավետիսյանների հարազատները: