Ի՞նչ դրդապատճառներ կան դատավոր Արմեն Բեկթաշյանի սուբյեկտիվ որոշումների հիմքում

Օրեր առաջ Կենտրոն և Նորք-Մարաշ վարչական շրջանների ընդհանուր իրավասության դատարանում կալանավորվել է քաղաքագետ Սուրեն Սուրենյանցը: Նախագահող դատավոր Արմեն Բեկթաշյանի հրապարակած վճռի համաձայն՝ Սուրենյանցի խափանման միջոցը փոխվել է. մեկ միլիոն դրամ գրավը չեղյալ է համարվել, և նրան կալանավորել են, ապա տեղափոխել «Նուբարաշեն» քրեակատարողական հիմնարկ:

Հիշեցնենք, որ Սուրեն Սուրենյանցին մեղադրանք է առաջադրվել 178 հոդվածի 2-րդ մասով՝ խարդախություն. «Խարդախությունը, որը կատարվել է՝ 1) մի խումբ անձանց կողմից նախնական համաձայնությամբ, 2) խոշոր չափերով, 3) կրկին անգամ, 4) նախկինում սույն օրենսգրքի 175-182-րդ, 234-րդ, 238-րդ, 269-րդ հոդվածներով նախատեսված հանցանք կատարած անձի կողմից՝ պատժվում է տուգանքով՝ նվազագույն աշխատավարձի չորսհարյուրապատիկից յոթհարյուրապատիկի չափով, կամ ազատազրկմամբ՝ երկուսից վեց տարի ժամկետով և տուգանքով՝ նվազագույն աշխատավարձի առավելագույնը հիսնապատիկի չափով կամ առանց դրա»:

Մինչ կալանավորումը Սուրենյանցը հանդես է եկել պաշտպանական ճառով և հայտնել, որ իրեն հնարավորություն չեն տվել պատրաստվել, ինչը նախապես պետք է անեին: Նա նշել է, որ երբեք չի հայտարարել, որ անմեղ է, մեղքի բաժին չունի, բայց ամեն մարդ պետք է դատապարտվի իր կատարած արարքին համապատասխան:

«Գործի բացահայտումը ենթադրում է, որ եթե գործում կան մարդիկ, որոնք տուժող չեն, ապա նրանք ևս պատասխանատվություն պետք է կրեն: Տուժողներ Անուշի և Հայկազի մասով ինձ մեղավոր եմ ճանաչում և մեղքս ընդունում եմ: Ազգանուշի մասով դարձյալ չեմ ասում, որ մեղավոր չեմ: Բայց Անուշի գումարների 90 տոկոսը տնօրինվել են այլ մարդկանց կողմից: Թե՛ ձայնագրությամբ, թե՛ բջջային օպերատորների արված ձայնագրությունների միջոցով կապացուցեմ դա: Նարեկ Մանուկյանին՝ որպես տուժող, չեմ ճանաչում: Եթե նա գործից տեղյակ լիներ, ապա կիմանար, որ խոսքը ոչ թե Մեծ Բրիտանիայի մասին է, այլ ԱՄՆ-ի: Հետամուտ եմ լինելու, որ կեղծ մատնության համար մարդիկ պատասխանատվություն կրեն»,- ասել է Սուրենյանցը և վստահեցրել, որ վկաների ցանկը թերի է:

Aravot.am-ի լրագրողի հետ զրույցում Սուրենյանցը նշել է, թե իր համար պարզ է, որ առաջին ատյանի դատարանը լրիվ և ամբողջական քննություն չի իրականացնում և ակնհայտորեն սուբյեկտիվ է տրամադրված. չի ընդունում իր՝ նիստը հետաձգելու մասին և այլ միջնորդություններ: Այնուհետև պնդեց. «Գործում կա իրական մեղադրյալ, որն այդպես էլ չներգրավվեց՝ նկատի ունեմ վկաներից մեկին: Վկաներից մեկը չդատակոչվեց թեև ծառայում է բանակում, բայց կարող էր մեկ ժամով գալ դատարան: Այնպես որ, ես ունեմ բոլոր հիմքերը Վերաքննիչ դիմելու համար»:

Ըստ Սուրենյանցի՝ գումարները տնօրինել են գործով վկա ներգրավված Ռոբերտ Ահարոնյանն ու Մարիաննա Ներսիսյանը, որին միջնորդել է, որ որպես վկա ներգրավվի, սակայն դա տեղի չի ունեցել: «Ոչ թե չորս հոգու հետ գործ ունեմ, այլ միայն Ռոբերտ Ահարոնյանի: Ո՞նց է պատահում, որ բոլոր տուժողները լինում են մեկ մարդու աշխատողները»,- ասել է Սուրենյանցը:

Ի դեպ, նշենք, որ նախորդ դատական նիստին Ռոբերտ Ահարոնյանը հայտարարել էր, որ ինքը վերադարձրել է Նարեկ Մանուկյանի և Հայկազ Մարտիրոսյանի գումարը: Հաշվի առնելով այն, որ Սուրենյանցը Նարեկ Մանուկյանին չի ճանաչում, ստացվում է, որ գումարը վերադարձվել է մտացածին տուժողին:

Սուրեն Սուրենյանցի խոսքով՝ դատավոր Արմեն Բեկթաշյանի հետ իրենք ժամանակին ընկերներ են եղել, սակայն, ինչպես որ ցույց է տալիս դատական նիստերի ընթացքը, մեզ անհայտ պատճառով նրանց ճանապարհները բաժանվել են: Որո՞նք են այն դրդապատճառները, որոնք ընկած են պարոն Բեկթաշյանի սուբյեկտիվ որոշումների հիմքում այս գործի վերաբերյալ, այն է՝ հնարավորություն չտալ պատրաստվել ճառից առաջ, հաշվի չառնել Սուրենյանցի պնդումները՝ գործում այլ մարդկանց մասնակցության վերաբերյալ, որի օգտին կան որոշակի փաստեր, փոխել խափանման միջոցը՝ նույնիսկ հաշվի չառնելով ամբաստանյալի խնամքին գտնվող նորածնի հանգամանքը, ինչի մասին դատարանին տեղյակ է պահել Սուրենյանցի կինը՝ ներկայացնելով համապատասխան փաստաթղթերը: Արդյո՞ք պատճառն անձնական է, թե՞՝ թելադրված է այլ անձանց կամ ուժերի կողմից՝ ցույց կտա ժամանակը: Այն, որ Սուրենյանցն ընդունում է իր մեղքը և պատրաստ է փոխհատուցել տուժողներին, պետք է ողջունել և հնարավորություն տալ իրականացնել դա, այլապես կալանքի տակ գտնվող մարդուց գումարների փոխհատուցում պահանջելն առնվազն ոչ տրամաբանական է ստացվում: Պետք է հուսալ, որ Վերաքննիչ դատարանում ավելի պրոֆեսիոնալ և օբյեկտիվ կերպով կքննեն հասարակության ուշադրության կենտրոնում հայտնված այս գործը և կկայացնեն իրապես արդարացի որոշում: