Դատարանը վերստին հետաձգել է Լևոն Հայրապետյանի գործի քննությունը

Մոսկվայի Զամոսկվորեչյան դատարանը վերստին չի կարողացել ձեռնամուխ լինել ձեռնարկատեր Լևոն Հայրապետյանի նկատմամբ քրեական գործն ըստ էության քննելուն՝ խարդախության էպիզոդով՝ կապված դատապարտված նախկին սենատոր Իգոր Իզմեստեւի մորից 700 հազար դոլար ստանալու հետ, տեղեկացնում է «Արմենպրես»-ը՝ հղում անելով ՏԱՍՍ-ին:

Դատական նիստը մեղադրյալի փաստաբանի հիվանդության կապակցությամբ հետաձգվել է հունվարի 18-ին: Դատական նիստը տեղափոխելու միջնորդությամբ հանդես է եկել փաստաբան Օլգա Մորոզովան: «Խնդրում եմ դատարանին՝ հետաձգել դատական նիստն այն բանի կապակցությամբ, որ իմ պաշտպանյալի շահերը ներկայացնող փաստաբանը գտնվում է հիվանդանոցում, և ինձ հետ պայմանագիրը կնքվել է միայն երեկ»,- ասել է նա: Միջնորդությունը բավարարվել է:

Դատարանն արդեն մեկ ամիս է՝ չի կարողանում ձեռնամուխ լինել գործն ըստ էության քննելուն:

Լևոն Հայրապետյանը մեղադրվում է ՌԴ Քրեական օրենսգրքի 159 հոդվածի չորրորդ մասով նախատեսված հանցագործություն (խարդախություն) կատարելու մեջ: Հետաքննության տվյալներով՝ 2010 թվականի հունիսից մինչև օգոստոս Հայրապետյանը, փաստաբան Սերգեյ Անտոնովի հետ համատեղ «խաբեության և վստահության չարաշահման ճանապարհով մոլորության մեջ է գցել Մոսկվայի բնակչուհուն՝ խոստանալով դրամական վարձատրության դիմաց հասնել նրա որդու նկատմամբ ավելի մեղմ դատավճռի կայացման»: Դրա դիմաց Հայրապետյանը նրանից դրամական միջոցներ է ստացել 700 հազար դոլարի չափով: Իրականում Հայրապետյանը հնարավորություն չի ունեցել ազդելու տվյալ դատավճռի վրա:

Լևոն Հայրապետյանը ձերբակալվել է 2014 թվականի հուլիսին նախկին սենատոր Իգոր Իզմեստևի խոստովանական ցուցմունքներից հետո, որը ցմահ բանտարկության է դատապարտված առանձնապես ծանր մի շարք հանցագործություններ կատարելու համար: