Նախարարը մեկնաբանել է գործատուի կողմից աշխատողի անձնական նամակները կարդալու իրավունքը

ՀՀ արդարադատության նախարար Արփինե Հովհաննիսյանը ճիշտ չի համարում ընդհանրական եզրակացություններ անել Մարդու իրավունքների եվրոպական դատարանի վճռի վերաբերյալ, որով իրավաչափ է համարվել գործատուի կողմից աշխատակիցների անձնական հաղորդակցությունները, տվյալ դեպքում՝ էլեկտրոնային նամակագրությունը ստուգելը:

Մարդու իրավունքների Եվրոպական դատարանը օրերս «Բարբուլեսկյուն ընդդեմ Ռումինիայի» գործով նախադեպային վճիռ է կայացրել, որով իրավաչափ է համարվել գործատուի կողմից աշխատակիցների անձնական հաղորդակցությունները, տվյալ դեպքում՝ էլեկտրոնային նամակագրությունը ստուգելը, որը կատարվել է աշխատանքային ժամերին:

Լրագրողների հետ զրույցում Արփինե Հովհաննիսյանը նկատեց, որ առաջին հերթին յուրաքանչյուր ոք ուշադրություն պետք է դարձնի, թե աշխատանքային պայմանագրով ինքը ինչ պարտավորություններ է ստանձնում: «Խոսքը նաև ձեզ է վերաբերում , ցանկացած աշխատողի, ով գործատուի հետ պայմանագիր է կնքում: Որովհետև , եթե ուշադրություն դարձնեք, Եվրոպական դատարանի որոշումը, ըստ էության, կայացվել է այն հիմքի վրա, որ պայմանագրով անձը ստանձնել էր պարտավորություն, որ ինքը կոնկրետ հաղորդագրությունների միջոցով պետք է շփվի հաճախորդների հետ և դա հասանելի է լինելու գործատուի համար: Եվ գործատուն, վստահ լինելով աշխատողի հավաստիացումների վրա, որ այլ անձնական բնույթի նամակագրություն չի եղել, և պայմանագրով էլ ունենալով իրավունք կոնկրետ այդ նամակագրությունը կարդալու և բացելու, իրացրեÕ ¬ է իր այդ իրավունքը՝ ի սկզբանե նպատակ անգամ չունենալով անձնական տվյալների պաշտպանությունը խախտել: Ուշադրություն դարձրեք, երբ նա բացել է աշխատողի նամակագրությունը, ինքը չի բացել, որ տեսնի այնտեղ կա՞ որևէ այլ նամակ, թե ոչ: Ինքը բացել է, որովհետև պայմանագրով աշխատողի համար այդպիսի պարտավորություն է սահմանած եղել, իսկ աշխատողն էլ հավաստիացրել է, որ ինքը որևէ այլ անձնական բնույթի նամակագրություն չի վարել, դրա համար էլ գործատուն իրացրել է իր իրավունքը և կարդացել է այդ նամակագրությունը»,- «Արմենպրես »-ի հաղորդմամբ՝ մանրամասնեց նախարարը:

Արփինե Հովհաննիսյանը հավելեց, որ «Բարբուլեսկյուն ընդդեմ Ռումինիայի» գործով ՄԻԵԴ-ի կայացրած վճիռը դեռ չի նշանակում, որ գործատուն կարող է բացել ու կարդալ աշխատողի համակարգչի կամ հեռախոսի մեջ տեղադրված հավելվածը, որով նա անձնական նամակագրություն է վարում: «Պարզապես մարդիկ պետք է ուշադրություն դարձնեն հստակ պայմաններին ու պայմանագրերին, որով աշխատում են: Դրա համար ես ձեզ էլ եմ հորդորում ուշադրություն դարձնել այն պայմանագրերին, որոնցով դուք աշխատում եք»,- եզրափակեց նախարարը: