Ոստիկանների ուղղությամբ կրակոցներ արձակած բնակարանագողերը հայտնաբերվել և ձերբակալվել են

Ոստիկանության Տարոնի բաժնում հունվարի 30-ին, ժամը 3.05-ին մի քաղաքացուց ահազանգ է ստացվել, որ հարևան տանը, որի բնակիչներն արտասահմանում են, ձայներ են լսվում ու լույս է երևում:

Դեպքի վայր մեկնած օպերատիվ խմբի անդամները նկատել է 3 հոգու, որոնք նշված տան պատուհանից դուրս ցատկելով և ոստիկանության ծառայողների ուղղությամբ կրակոցներ արձակելով՝ դիմել են փախուստի:

Փաստի առթիվ հարուցվեց քրեական գործ ՀՀ քրեական օրենսգրքի 34-177-րդ հոդվածի 3-րդ մասի 1.1 կետի (գողության փորձ՝ բնակարան ապօրինի մուտք գործելով), 34-104-րդ հոդվածի 2-րդ մասի 1-ին, 2-րդ կետերի (սպանության փորձ՝ 2 կամ ավելի անձանց նկատմամբ՝ կապված նրանց կողմից իրենց ծառայողական գործունեության հետ) և 235-րդ հոդվածի 1-ին մասի (ապօրինի կերպով հրազեն ձեռք բերելը, պահելը) հատկանիշներով:

Հարուցված քրեական գործի շրջանակներում, հանցագործությունը կատարելու կասկածանքով, նույն օրը հայտնաբերվեցին և ձերբակալվեցին 1993 թ. ծնված Ռադիկ Ռ.-ն, 1992 թ. ծնված Արա Գ.-ն և 1991 թ. ծնված Արթուր Ս.-ն: Այս մասին «Արմենպրես»-ին տեղեկացրին ՀՀ ոստիկանության հասարակայնության հետ կապերի եւ լրատվության վարչությունից:
Արա Գ.-ի զննությամբ՝ աջ ուսահոդի շրջանում, հայտնաբերվել է այրած վերք, իսկ ձախ ծնկահոդի մասում' փափուկ հյուսվածքների սալջարդ։ Նա հայտարարել է, որ վնասվածքները ստացել է գողություն կատարելիս, ոստիկանների հետ փոխհրաձգության ժամանակ, կրակոցի հետևանքով:

Հրավիրվել է շտապ բուժօգնության անձնակազմ, Արա Գ.-ն տեղափոխվել է հիվանդանոց և համապատասխան բուժօգնություն ստանալուց հետո ներկայացվել Լոռու մարզային քննչական վարչություն:

Արա Գ.-ի տան խուզարկությամբ՝ լոգարանի առաստաղի օդափոխության համակարգում, հայտնաբերվել է առանց համարի թմբուկավոր ատրճանակ, թմբուկի մեջ՝ 7 պարկուճ և 1 փամփուշտ, իսկ պոլիէթիլենային պարկի մեջ' 16 փամփուշտ:
Արթուր Ս.-ի բնակարանում և օժանդակ շինություններում խուզարկությամբ հայտնաբերվել է ինքնաձիգի 7.62 մմ տ/չ 1 փամփուշտ: Արա Գ.-ն հայտարարել է, որ ատրճանակը՝ փամփուշտներով, պատկանում է իրեն:

Հանգամանքները պարզվում են:

Քննությունը վարում է ՀՀ քննչական կոմիտեի Լոռու մարզային քննչական վարչությունը: