Խմբագրական. Ասեմ Լևոն Զուրաբյանին, որ մենք սադրանքներով երբեք չենք զբաղվում, սադրանքներով զբաղվում է ինքը (տեսանյութ)

Օրեր առաջ ԱԺ պատգամավոր Լևոն Զուրաբյանն ԱԺ-ում իր ելույթի ժամանակ իբրև թե լեզվի սայթաքում է թույլ տվել՝ բառացիորեն ասելով. «Հարգելի՛ պարոն վարչապետ, և անցյալում նաև «Ոչ»-ի, ներողություն՝ «Այո»-ի շտաբի պետ...»: Ինչու՞ եմ ասում իբրև թե սայթաքում, որովհետև տեսագրության մեջ պարզ երևում է, որ Զուրաբյանի ձեռքում թուղթ կա և նա կարդում է տեքստը, ընդ որում՝ ուշադիր թղթին նայելով, հետևաբար չմտածված սայթաքման վարկածը ես բացառում եմ: Եվ պատահական չէ, որ լրագրողներն այս «սայթաքումը» մեկնաբանել էին որպես ակնարկ վարչապետ Հովիկ Աբրահամյանին, թե վերջինս սահմանադրական հանրաքվեի ժամանակ աջակցել է նաև «Ոչ»-ի շտաբին:

Եվ օրերս ԼՈՒՐԵՐ.com-ի լրագրողն էլ հանդիպումներից մեկի ժամանակ շատ տրամաբանական հարց էր ուղղել վարչապետին, թե ի՞նչ նկատի ուներ Լևոն Զուրաբյանն իր այդ ակնարկով: Վարչապետն էլ կրկին տրամաբանական պատասխան էր տվել, թե այդ հարցին կպատասխանի այն ժամանակ, երբ Զուրաբյանը փաստեր կներկայացնի: Եվ ահա Լևոն Զուրաբյանը լրատվական կայքերից մեկին ասել է, թե դա սադրանք է, թե իբր ինչ-որ մեկն ապուշություն է գրել, հիմար հարց է տվել ու իրեն վերագրել է մի բան, որն ինքը չի արել:

Ուրեմն ասեմ Լևոն Զուրաբյանին, որ մենք սադրանքներով երբեք չենք զբաղվում, սադրանքներով զբաղվում է ինքը: Դա հասկանալու համար ընդամենը բավական է հետևել նրա գործունեությանը: Մեր լրագրողները երբեք հիմար հարցեր չեն տալիս, այլ տալիս են և տվել են խիստ տրամաբանական հարց: Ոչ ոք չի ասել, թե Զուրաբյանը Հովիկ Աբրահամյանին բացահայտ համարել է «Ոչ»-ի շտաբի ղեկավար, այլ՝ նրա լեզվի «սայթաքումը» մեկնաբանվել է որպես ակնարկ այդ մասին: Իսկ այն, որ նման «սայթաքում» եղել է՝ դա սադրանք չէ, այլ փաստ է, փաստ, որը ֆիքսել են տեսախցիկները, ինչը նորից ներկայացնում եմ բոլորի ուշադրությանը: Փաստորեն, Զուրաբյանն ուզում է ասել՝ տեսախցիկնե՞րն էլ են սադրում...

Ցավալի է, որ ԱԺ պատգամավորն ի վիճակի չէ մեկնաբանելու իր իսկ ասածները և զարմանալի է, թե այդ դեպքում ինչպե՞ս է նա հավակնում երկրում իշխանություն փոխել ու հետո էլ երկրի ղեկավար կազմում հայտնվել: Զավեշտալի է:

Կարեն Վարդանյան