Քուշկյանը՝ ՀՀ առողջապահության նախարա՞ր

Այսօր հայտնի դարձավ, որ Լեռնային Ղարաբաղի առողջապահության նախարար Հարություն Քուշկյանն աշխատանքից ազատման դիմում է ներկայացրել։ Քուշկյանն Արցախի առողջապահության նախարարի պաշտոնում նշանակվել էր 2014 թվականին։ Այս նորությունից անմիջապես հետո, սկսվեցին շրջանառվել տարբեր վարկածներ, ընդհուպ մինչև կրկին ՀՀ առողջապահության նախարարի պաշտոնում նշանակվելը։ Պետք է խոստովանել, որ ՀՀ առողջապահության ոլորտում Քուշկյանը կարողանում էր ճիշտ մենեջմենթ իրականացնել, անհրաժեշտ պահերին ինքնակազմակերպվել և հանրօգուտ որոշումներ կայացնել։

Բնավ չենք ցանկանում թերագնահատել ներկա նախարար Արմեն Մուրադյանի մասնագիտական և մարդկային կարողությունները, սակայն անաչառության և օբյեկտիվության համար պետք է նշել՝ նախարար Արմեն Մուրադյանն այդպես էլ չկարողացավ առողջապահության ոլորտը կարգավորել։ Ինչքան էլ նա դրական կերպար ունի բոլորի մոտ, միևնույն է՝ դա քիչ է նման կարևոր նշանակության ոլորտը ճիշտ կառավարելու համար։ Օրինակի համար կարող ենք նշել վերջերս Հայաստանում համաճարակային այն արտակարգ իրավիճակը, որի ժամանակ իսկական խառնաշփոթ էր տիրում, հիվանդանոցներում տեղ չկար, երեխաների համար պայմաններ չկային, անհնար էր իրավիճակը վերահսկել, ինչքան էլ պետական մակարդակով հանգստության կոչեր էին անում և հավաստիացնում, որ վտանգ չկա։

Այնուամենայնիվ, այսօր առողջապահության ոլորտը լուրջ փոփոխությունների կարիք ունի, ճիշտ կառավարողի կարիք ունի։ Չի բացառվում, որ հենց Հարություն Քուշկյանը նորից կստանձնի այս ոլորտի պատասխանատվությունը։ Մամուլում նաև շրջանառվում է, որ առողջապահության ներկա նախարար Արմեն Մուրադյանն առաջիկա մայիսին ազատվելու է զբաղեցրած պաշտոնից և աշխատանքի է անցնելու Առողջապահության համաշխարհային կազմակերպությունում՝ որպես նախագահի տեղակալ:

Նշենք՝ Արմեն Մուրադյանը նախարարի պաշտոնն ստանձնել է 2014 թվականի ապրիլի 24-ից։