Ընդդեմ Հայաստանի՝ ՀԱՊԿ-ում հետևողական քաղաքականություն է տարվում. Խաչատուր Քոքոբելյան

ԱԺ պատգամավոր, Ազատ Դեմոկրատներ կուսակցության նախագահ Խաչատուր Քոքոբելյանը, այսօր ամփոփելով ՀԱՊԿ երևանյան գագաթնաժոողովը, մի քանի դիտողություններ ներկայացրեց, որոնք, ըստ նրա, ապացուցում են, որ այդ կառույցին Հայաստանի անդամակցությունն արդարացված չէ:

ԱԺ-ում լրագրողների հետ զրույցում պատգամավորը նշեց, որ ՀԱՊԿ նիստից հետո հստակ որևէ հայտարարություն չեղավ, թե օրակարգում մասնավորապես ինչ հարցեր են քննարկվել: «Այդ կառույցի կարևորագույն խնդիրների հետ կապված որևէ հստակ տեղեկատվություն գոնե լրագրողների մակարդակով չհատկացվեց»,- ասաց նա:

Բացի այս՝ պատգամավորն ընդգծեց նաև, որ Լեռնային Ղարաբաղի հետ կապված ևս որևէ կոնկրետ հայտարարություն չհնչեց, ինչը փաստում է այն մասին, որ Ռուսաստանն այս հարցի հետ կապված ունի կանխակալ դիրքորոշում:

«Այս էլ որերորդ անգամն է, որ ՀԱՊԿ որևիցե գագաթաժողովում կամ այդ կառույցի նիստերի ժամանակ հստակ դիտարկումներ չի հնչում նաև Արցախի հետ կապված: Չի եղել հստակ որևէ դիտարկում, որտեղ արտացոլված լինի ադրբեջանական ագրեսիան: Բայց չէ, որ եթե մենք ՀԱՊԿ-ի անդամ ենք ու, եթե այդ կառույցն անվտանգության համակարգ է, մեր սպառնալիքը պետք է այդ փատաթղթում արտացոլվի: Ավելին՝ դա ոչ միայն չի արտացոլվել ու արտացոլվում, այլև ռուսական կողմն ամենաբարձր մակարդակով հայտարարում է, որ օրակարգում նման հարց չի եղել: Իսկ այսքանից հետո, եթե մեր որոշ գործընկերներ պնդում են, թե ՀԱՊԿ անդամակցությունն ի նպաստ Հայաստանի է, ապա դա ինձ համար զարմանալի ու աբսուրդ է»,- ասաց նա:

Անդրադառնալով օրակարգի մյուս կարևորագույն կետերից մեկին, որը ևս բխում էր Հայաստանի շահերից, ընդդիմադիր պատգամավորն ընդգծեց, որ արդեն երկրորդ անգամն է, որ հետաձգվում է Հայաստանի կողմից ՀԱՊԿ քարտուղարի պաշտոնին հավակնող և հայկական կողմից ներկայացված ներկայացուցչի նշանակումը:

«Թեև հայտարարվեց, որ այդ հարցը կընդգրկվի դեկտեմբերին կայանալիք հանդիպման ժամանակ, սակայն ես վստահ չեմ, քանի որ չեմ բացառում, որ ՀԱՊԿ քարտուղարի նշանակման հարցը ևս մեկ անգամ հետաձգվի»,- հավելեց նա:
Պատգամավորի խոսքով՝ ակնհայտ երևում է, որ ՀԱՊԿ-ում ընդդեմ Հայաստանի հետևողական քաղաքականություն է տարվում: «Նման մակարդակով, նման քննարկումների և նման նշանակումների ժամանակ վրիպումներ, սովորաբար, չեն լինում: Սա նշանակում է, որ շատ մտածված ու հետևողական քաղաքականություն է տարվում: Ավելին՝ ՀԱՊԿ-ում Լեռնային Ղարաբաղի հետ կապված՝ նույնիսկ զգուշավորություն եմ նկատում և, մասնավորապես, Ռուսաստանի պահվածքում, որը մինչ օրս որևէ լուրջ գնահատական չի տվել քառօրյա պատերազմական գործողություններին ու ադրբեջանական ագրեսիային, ով առաջինը խախտեց պատերազմական բոլոր նորմերը, այդ թվում՝ միջազգային կոնվենցիաներով ամրագրված բոլոր կետերը, որոնք չեն կարող հաշվի չառնվել: Տպավորություն է, որ այդ կառույցի շատ գործիչներ նույնիսկ նպատակահարմար էլ չեն գտնում այդ մասին խոսել: Բայց այդպես չէ. Հայաստանը պարտավոր է օր առաջ բարձրաձայնել մտահոգող բոլոր հարցերը, այլապես պարզ կդառնա, որ ՀԱՊԿ-ը Հայաստանի համար որպես անվտանգության համակարգ չի ծառայում: Ես բազմիցս եմ ասել, որ ՀԱՊԿ-ը ռուսական իշխանություններին հարմարեցված ռազմաքաղաքական գործիք է, որն օգտագործվում է միայն ի շահ այսօրվա Ռուսաստանի»:

Դիտարկմանը՝ հնարավո՞ր է, որ քարտուղարի նշանակման հետաձգումը պայմանավորված էր թեկնածուների ոչ ճիշտ ընտրությամբ, Քոքոբելյանը չհամաձայնեց, նշելով, թե անձերի այդ պաշտոնի չնշանակումն անձով չէ պայմանավորված: «Այդպիսի պաշտոնները միայն գագաթաժողովի ժամանակ չեն առաջարկվում: Համաձայնություններն ու քննարկումները լինում են մինչ գագաթաժողովը: Պարզապես այս լարված թատերաբեմում՝ Սիրիա, Ուկրաինա… Ռուսաստանը գտնում է, որ այդ կառույցը պետք է իր վերահսկողության տակ պահի: Ես այն կարծիքին չեմ, որ այդ պաշտոնը, եթե զբաղեցնի որևէ այլ անդամ երկրի ներկայացուցիչ, կվերանան դրանք, բայց գտնում եմ, որ գոնե Հայաստանին վերաբերող խնդիրներին ցանկացած հայ պաշտոնյա ավելի ուշադիր կլինի, քան մյուսները: Այս առումով ես կարծում եմ, այդ կառույցում Հայաստանի իրավունքները ոտնահարվել են»,- եզրափակեց նա: