Այս պահին դեֆոլտի խնդիր չունենք. Վահրամ Բաղդասարյան

Ազգային ժողովի ՀՀԿ խմբակցության ղեկավար Վահրամ Բաղդասարյանը Հայաստանում դեֆոլտի վտանգ չի տեսնում: Անդրադառնալով ՀՀ առաջին նախագահ Լևոն Տեր-Պետրոսյանի այն հայտարարությանը, թե Հայաստանը կանգնած է դեֆոլտի վտանգի առջև, վերջինս նշեց, որ թեև տարիներ շարունակ նման շահարկումներ եղել են, բայց այս պահին ինքը նման վտանգ չի տեսնում:

«Մենք դեֆոլտի խնդիր չունենք: Իհարկե, եթե մենք ճիշտ ռազմավարություն չտանենք, տարիների ընթացքում կարող ենք նման խնդրի առջև կանգնել, բայց այս պահին նման վտանգ չկա»,- ԱԺ-ում լրագրողների հետ զրույցում ասաց պատգամավորը:

Դիտարկմանը՝ Հայաստանի արտաքին պարտքի բեռը մեծացել է, պատգամավորը հակադարձեց, թե արտաքին պարտքը թույլատրելի սահմաններում է:

«Դուք կարող եք տարածաշրջանի երկրների հետ համեմատության մեջ նայել և տեսնել, որ թույլատրելիի սահմաններում է մեր պարտքը: Իհարկե, մենք պետք է կարողանանք այնպիսի ծրագրեր ներկայացնել, այնպիսի մոտեցումներ ցուցաբերել, որ ապագայում կարողանանք թեթևացնել արտաքին բեռը»,- ասաց Վահրամ Բաղդասարյանը:

Հարցին՝ Լևոն Տեր-Պետրոսյանի այդ հայտարարությունը կարո՞ղ է բացասական հետևանքներ ունենալ ներդրումների ներգրավման աշխատանքների վրա, պատգամավորը հավելեց. «Իհարկե, տարբեր երևույթներ իրենց ազդեցությունը ունենում են, բայց այն արտաքին քաղաքականությունը, որը մենք տանում ենք, այն բացատրական աշխատանքները, որ իրականացնում ենք, դրական մթնոլորտ են ստեղծում: Բացի այդ, ունենք նոր կառավարություն, նոր ծրագրեր, նոր սպասելիքներ: Նաև համապատասխան նախարարության անունն է փոխվել, որն ավելի շատ է սևեռվել ներդրումների վրա, և ես կարծում եմ, որ այս ամենի արդյունքը երևալու է, բայց եկեք ժամանակից առաջ չընկնենք»,- ասաց նա: