Նոր փոփոխություններ 1in.am-ում

Երեկ երեկոյան համացանցում հերթական լուրը տարածվեց, որից պարզ էր դառնում, որ հերթական փոփոխությունն է կատարվում 1in.am լրատվական կայքում: Իհարկե, այս դեպքում խոսքը չի գնում կայքի փակվելու մասին, բայց ամեն դեպքում կատարվել է արմատական փոփոխություն:

Կայքի սեփականատեր Արման Բաբաջանյանն այլևս գլխավոր խմբագիրը չէ: Ինչպես նշված է հայտարարության մեջ՝ Բաբաջանյանը այսուհետ պատասխանատու կլինի կայքի տեխնիկական վերազինման և արդի միջոցների ներգրավման համար։

Իսկ կայքի գլխավոր խմբագիր է նշանակվել Աղասի Ենոքյանը, ով նույն լրատվամիջոցում հեղինակային հաղորդում էր վարում, իսկ նախկինում «Ազատություն» ռադիոկայանի երևանյան գրասենյակն էր ղեկավարել, աշխատել է վարչապետ Տիգրան Սարգսյանի կառավարությունում, քաղաքագետ է՝ «Քաղաքական և միջազգային հետազոտությունների հայկական կենտրոնի» տնօրենը:

Հայտարարությունը տարածվելուն պես ակտիվորեն սկսվեց քննարկվել հարցը, որ Բաբաջանյանը թողել է ակտիվ լրագրությունը ակտիվ քաղաքականություն մտնելու համար: Սակայն հարցը դեռ պատասխան չունի նրա կողմից, որովհետև նա, ըստ մեր տեղեկությունների, ԱՄՆ-ում է:

Հարցին արդեն անդրադարձել է Աղասի Ենոքյանը՝ նշելով, որ իր հետ զրույցում Բաբաջանյանը չի խոսել այն մասին, որ պատրաստվում է դառնալ պատգամավոր:
Թե ինչ է պատրաստվում անել Բաբաջանյանը, պարզ կդառնա առաջիկայում, երբ նա վերադառնա Հայաստան:

Իսկ մինչ այդ արդեն իսկ նկատելի է կայքում կատարված փոփոխությունը: Չկա ուղիղ եթերը: 12 ժամյա լուրերի թողարկումն այսօր այդպես էլ չսկսվեց և երևի թե չի էլ սկսվի:

ԼՈւՐԵՐ.com-ի տեղեկություններով՝ տեխնիկական մասով պատասխանատու շատ աշխատակիցներ՝ մոնտաժնիկներ, օպերատորներ, ազատվել են աշխատանքից:
Խոսվում է, որ կադրային ջարդն իրականում շատ ավելի ընդգրկուն է:

Գրեթե չի աշխատում նաև կայքի սպորտային բաժինը, ինչը ենթադրել է տալիս, որ այն ևս փակման եզրին է:

Այս ամենը վկայում է մի բանի մասին՝ կամ Բաբաջանյանը ունի ֆինանսական խնդիրներ և քայլ առ քայլ հեռանում է դաշտից, կամ նոր խաղ է սկսել:

Ի դեպ, մեր տեղեկությունների համաձայն, նախագահականում տեղի ունեցած կադրային փոփոխությունն անմիջապես ազդել է նաև լրատվական դաշտի վրա՝ մասնավորապես որոշվել է, որ այսուհետ այլ ձեռագրով են աշխատելու արևմտամետ ձգտումներ ունեցող լրատմավիջոցները, սահմանափակվելու է նրանց խոսքն ու տարածած նյութերի քանակը:
Ստացվում է՝ առաջին հարվածը հասցվել է հիշյալ կայքին:

Բոլորին է հայտնի, որ առաջին լրատվականը մեծ տեղ է հատկացնում արևմտամետներին: