«Одноклассники-ով մարդ են ման գալիս` կառավարություն են սարքում»

Պատգամավոր Հեղինե Բիշարյանն այն կարծիքինն է, որ Ազգային ժողովում կան մարդիկ, ովքեր նույնիսկ Ընտրական օրենսգիրքը չեն կարդացել, օրենքներից տեղյակ չեն, գործընթացները բացարձակապես չեն պատկերացնում և կուրծք են ծեծում`պաշտպանելու քաղաքական մեծամասնությանը, արդարացնելու զավեշտները, ինչ տեղի է ունեցել ընտրական օրերին:

«Ամենացավալին այն է, որ նման մարդիկ ռոմանտիկ են, որովհետև իրենց կյանքը բարեկեցիկ է դարձել, որովհետև իրենց համար որևէ պակաս բան չկա, հո՞ իրենք գյումրեցու և վանաձորցու նման չեն ապրում, որ մտածեն նրանց մասին: Կարևորն իրենց բնակարանները փոխեն, շքեղությունն ավելանա և պայքարողներին ճղճղացող անվանեն»,- ասաց Բիշարյանը: 

Ըստ պատգամավորի` լավ կլիներ, որ դահլիճում բոլորը ներկա լինեին և լսեին այն խայտառակությունները, որ տեղի են ունեցել երկու քաղաքաներում (Խմբ.- Գյումրի և Վանաձոր)

«Զբաղված են մարդիկ կառավարությունում, ման են գալիս հորքուրի, հորոխպոր, քեռու թոռ, երեխա , ընգեր, զանգերը կապել են, Одноклассники-ով  մարդ են ման գալիս` կառավարություն են սարքում, մինչդեռ այսօր այդ կառավարությունը արհամարհում է ամբողջ խորհրդարանին` Ընտրական օրենսգրքի քննարկամանը մեկ հոգի ներկա չէ: Սա անելու բա՞ն է, ո՞ւմ հետ խոսենք, ինքներս մեզ հե՞տ խոսենք, հետո՞, ինչ որ բա՞ն է փոխվելու սրանով, սա ձեռագի՞ր է` սա արհամարհա′նք է»,- ասաց Բիշարյանը:

Պատգամավորը կոչ արեց նաև պատգամավորներին կառավարության հետ հարցուպատասխանի ժամանակ լքել դահլիճը, որովհետև նրանք արժանի չեն, վստահելի չեն:

Նշենք, որ Խորհրդարանը շարունակում է քննարկել ՀՀ Ընտրական օրենսգրքում փոփոխություններ և լրացումներ կատարելու մասին օրենքի նախագիծը, որը պայմանավորված է քաղաքական համաձայնությամբ: