«Հերիքա մեղադրեք իշխանություններին». Արմեն Ռուստամյանը պաշտպանում է մեծամասնությանը

Քննարկումները շատ հետաքրքիր են, սակայն դրանք կապված չեն ԸՕ հետ: ԱԺ-ում իր ելույթի ժամանակ նման դիտողություն արեց նաև ԱԺ ՀՅԴ խմբակցության ղեկավար Արմեն Ռուստամյանը:

Վերադառնալով Ընտրական օրենսգրքին՝ պատգամավորը նշեց, որ ցանկացած ընտրական օրենսգիրք, որքան էլ լավը լինի, չի կարող ապահովել այնպիսի միջավայր, որպեսզի բացառվեն կեղծիքներն ու ընտրախախտումները, սակայն, եթե համեմատության մեջ ենք դնում, ապա այս ընտրություները տարբերվում էին նախորդներից:

«Եթե, որպես քաղաքական ուժ մենք ներկա չլինենք ընտրատեղմասերում, միևնույն է, եթե գալիս են հանցավոր պայմանավորվածության, կարող են ամեն ինչ էլ անել: Նախորդ ընտրական օրենսգիրքն էլ էր լավը, բայց, ցավոք, տեխնիկական խնդիրներով չկիրառվեց»,- հավելեց պատգամավորը:

Ռուստամյանը կոչ արեց քաղաքական ուժերին սեփական անհաջողությունների համար չմեղադրել ո՛չ իշխանություններին, ո՛չ էլ, առավելևս՝ Սահմանադրությանը: «Հերիքա մեղադրեք իշխանություններին: Մտել եք խաղադաշտ ու պարտվել: Մի քիչ ճիշտ նայեք հարցերին: Մենք պետք է կամաց-կամաց բարելավվենք ընտրական պրոցեսը, իսկ մեղադրանքների ճանապարհը ճիշտ չէ, սթափվե՛ք: Այստեղ հայտարարություններ հնչեցին, թե մեղավոր են իշխանությունները, Սահմանադրությունը, բոլորը՝ բացի մեզանից: Մենք միշտ էլ անկեղծ խոսել ենք մեր բացթողումների մասին: Այնպես չէ, որ այն ինչ որ եղել ու չի ստացվել, դրա համար մեղավոր են իշխանություններն ու Սահմանադրությունը: Բա՞ ինչպես եղավ, որ ընդդիմությունը մեծամասնություն լինելով չվերածվեց ավագանիների մեծամասնության»,- հեգնեց ՀՅԴ-ական պատգամավորը:

Նա նաև հայտարարեց, որ նոր ԸՕ-ով հնարավորություններ ու գործիքներ են ստեղծվում, որպեսզի ընտրական պրոցեսներն ավելի թափանցիկ դառնան: Ինչ վերաբերում է քննադատություններին, ապա բնական է՝ Գյումրու և Վանաձորի ընտրություններից հետո պետք է նման հայտարարություններ լինեին:

«Իրավաչափության ու համաչափության հետ մենք չպետք է խնդիր ունենանք: Այո, այս առումով ես խնդիր եմ տեսնում և կարծում եմ, որ այդ դիտավորության հարցը պետք է ամրագրել: Մենք պետք է բացառենք ու խանգարենք կեղծ ու կրկնակի քվերակությունները: Եվ հենց այդ ուղղությամբ էլ խնդիրը տարել ենք: Այս Ընտրական օրենսգրքում մենք գործիքներ ենք ավելացնում, որպեսզի նրանք, ովքեր պետք է օգտագործեն, ընտրությունների ժամանակ ևս կիրառեն»- եզրափակե պատգամավորը: