Քաղաքական ուժերի հետ գտել ենք կոմպրոմիսային լուծում. Դավիթ Հարությունյան

ԱԺ արտահերթ նիստում երկրորդ ընթերցմամբ քննարկման է ներկայացվել Ընտրական օրենսգրքում լրացումներ ու փոփոխություներ կատարելու մասին օրենքների փաթեթը: Հիմնական զեկուցող, Կառավարության աշխատակազմի ղեկավար-նախարար Դավիթ Հարությունյանը հայտարարեց, որ քննարկումների ընթացքում ամենաշատը քննարկվել է Քրեական օրենսգրքի 154/8 հոդվածը.

«Խնդիրը վերաբերում էր այն հարցին, երբ անձը ներկայացնում է սուտ հայտարարություն, մեղքի որ տեսակի պարագայում, ինչպիսի քրեական պատասխանատվության պետք է ենթարկվի: Բուն վեճը վերաբերում էր դիտավորությամբ և անզգուշությամբ կատարված սուտ մատնությանը»,- ասաց նա՝ նշելով, որ այստեղ քաղաքական ուժեր հետ գտել են կոմպրոմիսային լուծում, որին կողմ են արտահայտվել նաև քննարկումների մասնակից բոլոր 5 քաղաքական ուժերը:

Դավիթ Հարությունյանի խոսքով՝ սուտ մատնություն նկատի ունեն դիֆերենցիան. «Եթե դիտավորության մասին է խոսք գնում, ապա պահպանվում է այդ պատժաչափը, որը ներկայացված էր նախագծում՝ 2-2,5 տարի, իսկ անզգուշությունը՝ կեղծ մատնությունն է, որի դեպքում քրեական պատասխանատավությունն ավելի մեղմ է»,- ասաց նա:

Պաշտոնյան շեշտեց նաև, որ պատիժ է սահմանվել նվազագույն աշխատավարձի երկու հարյուրապատիկից մինչեւ՝ ութհարյուրապատիկի չափով, կամ առավելագույնը՝ մինչեւ երկու տարի ազատազրկմամբ:

«Այստեղ էական մեղմում է տեղի ունեցել»,-հավելեց նա:

Կառավարության աշխատակազմի ղեկավար-նախարարն հայտարարեց նաև, որ այդ փոփոխությունները կկատարվեն այսօր, իսկ վաղը մինչ քվեարկությունը պատգամավորները կստանան ամբողջական փաթեթը:
Նիստը վարող, ԱԺ փոխխոսնակ Էդուարդ Շարմազանովն էլ ողջունեց ու շնորհակալություն հայտնեց բոլոր այն քաղաքական գործիչներին ու ուժերին, ում ջանքերի ու արդյունավետ աշխատանքի շնորհիվ այդ ամբիոնից ստացան բարի լուրը, թե կա կոմպրոմիս.

«Կարևորը, որ մենք եկել ենք համաձայնության: Ես լավատես եմ»,-հայտարարեց նա: