Կարեն Կարապետյանի վեց ամիսը

Հոկտեմբերի 18-ին տեղի ունեցավ ՀՀ կառավարության արտահերթ նիստ, որի ընթացքում քննարկվեց և հավանության արժանացավ Հայաստանի Հանրապետության կառավարության ծրագիրը:

33 էջանոց փաստաթուղթն արդեն հասանելի է կառավարության պաշտոնական կայքում և որպես նախաբան նշված է.

Հայաստանի Հանրապետության մարտահրավերները պահանջում են րոպե առաջ իրագործել բարեփոխումներ՝ այդ գործում ներգրավելով և օգտագործելով Հայաստանի և հայության ամբողջ ներուժը։ Անհրաժեշտ է հանրապետությունում արդյունավետ բարեփոխումների միջոցով ապահովել մեր երկրի գերագույն արժեք հանդիսացողի՝ Հայաստանի Հանրապետության քաղաքացու՝

– պաշտպանվածությունը,
– արժանապատվությունը,
– կենսամակարդակի բարձրացումը,
– արդար հասարակության մեջ ապրելը,
– լավատեսությունն ապագայի նկատմամբ։

Երբ ավելի ուշադրիր, կետ առ կետ ուսումնասիրում ես նոր ծրագիրը, սկսում ես հավատալ, որ շուտով ապրելու ես քո երազած երկրում, որն ունենալու է կայուն տնտեսական աճ, կանոնակարգված հարկային և մաքսային համակարգ, ճիշտ արտաքին քաղաքականություն…

Չկա մի ոլորտ, որն աչքի տակ չունենա գործադիրն ու գեղեցիկ շարադրանքով անելիքները չներկայացնի՝ 6 ամսում խնդիրներն հարթելու տեսլականով:

6 ամիս ՝ իրականում շատ կարճ ժամանակ, որի ընթացքում հնարավոր է հասնել դրական արդյունքի:

Սակայն տևողությունը հստակ է որոշված՝ հապաղել չի կարելի:

Հոկտեմբերի 17-ին, ՀՀԿ գործադիր մարմնի նիստի ավարտից հետո լրագրողների հետ զրույցում ՀՀԿ խոսնակ Էդուարդ Շարմազանովը հայտարարեց, որ կառավարության ծրագիրը դե յուրե վեցամսյա ծրագիր է, գործելու է մինչեւ ապրիլյան ընտրություններ, այդ իսկ պատճառով շատ կոնկրետ է գրված քայլերը:

Դե յուրե, Կարեն Կարապետյանը գործելու վեց ամիս ունի: Հենց այդ ժամանակահատվածում Կարապետյանի ղեկավարած կառավարությունը պետք է դուրս գա կեղտի սարդոստայնից, մաքրվի կոռուպցիոն երևույթներից, աղքատությունից, ունենա ճիշտ դատաիրավական և քրեաիրավական համակարգը կանոնկարգող ճիշտ օրենսդրություն:

Դա է պահանջում նախագահ Սարգսյանը:

«Կառավարության ծրագիրը բխում է ՀՀ նախագահի ծրագրային հիմնադրույթներից, Սերժ Սարգսյանի ծրագրային ելույթներից: Նախնական տարբերակում հստակ կան առաջնահերթություներ, որոնցից մեկն այն է, որ հանրային կյանքի բոլոր ոլորտները համակարգային բարեփոխումների կարիք ունեն: Ինչպես նախկինում, այնպես էլ հիմա այս ծրագրում եւս լուրջ տեղ է հատկացվում ներքին ու արտաքին անվտանգությանը» ,-ասել է Շարմազանովը:

Ստացվում է՝ ապրիլյան ՀՀ իշխանությունները ընտրության են գնում խաղադրույք կատարելով Կարեն Կարապետյանի վրա՝ թողնելով 2 տարբերակ:

Կամ ձախողված ծրագրի մեղքը բարդում են Կարապետյանի վրա և նրան հեռացնում խաղից՝ պարտությունը բացառապես վերագրելով վարչապետին, կամ էլ տոնում են կրկնակի հաղթանակ՝ ընտրություններում հերթական անգամ հաղթանակ և դրա պատճառը հանդիսացած կառավարության հաջողված ծրագիր, որն այս դեպքում վերագրում են նաև իրենց, քանզի երբ պետք է փայլել, հանրապետականները չեն զլանում և պարբերաբար նշում են, թե՝ եթե Կարապետյանը ՀՀԿ-ական չէ, դա չի նշանակում, որ յուրային չէ:

Այն, որ Կարապետյանին ամեն կերպ փորձում են ներքաշել հանրապետական քողի տակ, դա նշան է այն բանի, որ հաջողության դեպքում միգուցե Կարապետյանին շնորհվի նաև նախագահի պաշտոնը՝ Սերժ Սարգսյանը այն չի ցանկանում, Կարապետյանն էլ ՌԴ վառ ներակայացուցիչ է՝ ճիշտ և ճիշտ նախընտրելի կերպար:

6 ամիս՝ ստուգողական աշխատանքը հանձնելու և աթոռին հասնելու համար:

Հ.Գ.

Կառավարության արտահերթ նիստի երկրորդ հարցով էլ որոշվել է հոկտեմբերի 20-ին՝ ժամը 12:00-ին, գումարել ՀՀ Ազգային ժողովի արտահերթ նիստ. օրակարգում ընդգրկված է ՀՀ կառավարության ծրագրին հավանություն տալու հարցը:

Անի Սահակյան