«Բանակի մայրը». ֆիլմ՝ նվիրված ապրիլյան պատերազմի հերոսներին (տեսանյութ)

«Բանակի մայրը» նոր վավերագրական ֆիլմը նվիրված է ապրիլյան քառօրյա պատերազմում զոհված  բոլոր հերոս տղաների հիշատակին, սակայն պատմում է պատերազմի հերոս, կապիտան Արմենակ Ուրֆանյանի մոր մասին: 

Ֆիլմի հեղինակ Սոնա Տոնականյանը ԼՈՒՐԵՐ.com-ի հետ զրույցում ասաց, որ դեռ ապրիլյան պատերազմի օրերին է ցանկություն ունեցել լինելու Արցախում ու ֆիլմ պատրաստելու: «Այնպես ստացվեց, որ Արմենակ Ուրֆանյանը ստացել էր Արցախի Հանրապետության «Մարտական խաչ» 1-ին աստիճանի պետական շքանշան և տիկին Համեստը պետք է մեկներ Արցախ: Անկեղծ ասած՝ ինձ համար բավական ծանր է եղել տիկին Համեստի հետ շփումները, բայց ես համարձակություն գտա իմ մեջ և խնդրեցի նրանց հետ գնալ Արցախ, խոսել Ուրֆանյանի մարտական ընկերների հետ: Սակայն, հետո որոշեցի նկարել հենց Ուրֆանյանի մորը: Նա ինձ համար հզոր կերպար է: Նա իր տղային հիշում է միայն ժպիտով, ժպիտով է պատմում Արմենակի մասին: Լացն ու ողբն ավելի քիչ են, քան հպարտանալու կողմը: Տիկին Համեստն առաջին անգամ էր լինում այն հողում, որի համար զոհվել է իր որդին: Դա ինձ համար մեկ այլ աշխարհ էր: Մենք գնացել ենք այն տունը, որտեղ Արմենակն է բնակվել, խոսել հարևանների հետ, զինվորների հետ: Տիկին Համեստը գնացել է այն խրամատը, որտեղ իր որդին է մահացել ու առանց արցունքի ու ողբի հետևել է ամեն ինչին: Ես մինչև այսօր այդ տպավորությունների տակ եմ»,- պատմում է «Բանակի մայրը» ֆիլմի հեղինակը: 

Նրա խոսքով՝ «Ջավախք» հայրենակցական միությունն առաջարկում է նոյեմբերին հուշ-երեկո կազմակերպել՝ նվիրված ապրիլյան հերոսների հիշատակին: Հուշ-երեկոն նվիրված կլինի Արմենակ Ուրֆանյանին, բայց կանդրադառնանք բոլոր հերոսներին: Հենց այդ օրն էլ տեղի կունենա «Բանակի մայրը» ֆիլմի պրեմիերան: Բոլոր հերոսների մայրերն էլ հպարտանում են իրենց որդիներով: Ես ֆիլմում ցանկանում եմ Արմենակ Ուրֆանյանի մոր միջոցով ցույց տալ բոլոր մայրերի կերպարը: Ես մեծ ցանկություն ունեմ անդրադառնալ բոլոր հերոսներին, նրանց մայրերին, սակայն դեռ ֆինանսական, տեխնիկական ու մի քանի այլ խնդիրներ կան»,- իր խոսքը եզրափակեց երիտասարդ սցենարիստ-ռեժիսոր Սոնա Տոնականյանը:

Քրիստինա Աղալարյան

 Ստորև ներկայացնում ենք ֆիլմի թրեյլերը.