Եղիշե Չարենցի թոռնուհի Գոհար Չարենցը հանդիպում ունեցավ չարենցասերների հետ

«Կարմիր տան այսօրը» խորագրով միջոցառման մեկնարկը տրվեց Եղիշե Չարենցի տուն-թանգարանում: Լրագրողների և Չարենցի գրական արվեստի երկրպագուների հետ հանդիպում ունեցավ մեծանուն գրողի թոռնուհի Գոհար Չարենցը, ով պատմեց իր և իր ընտանիքի մասին: «Չարենցը հիմնականում բնակվում էր հյուրանոցներում, սակայն ամեն անգամ տուֆակերտ շենքի մոտով անցնելիս մտածում էր, որ հիանալի կլիներ բնակարան ունենալ այս կարմիր տանը: Ա յդ իսկ պատճառով նման խորագիր ընտրվեց»,-«Արմենպրես»-ի հաղորդմամբ՝ նշեց Եղիշե Չարենցի թոռնուհի Գոհար Չարենցը:

Գոհար Չարենցը ծնվել է 1958թ. Երևանում: «Առաջին ծանոթությունս Չարենցի հետ եղել է 7 տարեկանում, երբ մայրս ասաց, որ ինձ պապիս անվան դպրոց է տանելու»,-ասաց գրողի թոռնուհին:

Գոհարը սովորել է ԵՊՀ-ի ռոմանագերմանական բանասիրության ֆակուլտետի անգլիական բաժնում: Երրորդ կուրսում ծանոթացել է ապագա ամուսնու՝ Վահանի հետ, ով Եթովպիայից էր եկել Հայաստան: «Երբ ծնողներիս ասացի, որ ցանկանում եմ ամուսնանալ, հայրս դեմ չեղավ, մայրս՝ որոշեց ուսումնասիրել Եթովպիան, իսկ տատս ասաց, որ լսել է՝ իբր այնտեղ մարդկանց են ուտում»,-հիշեց Գոհարը:

Նրա խոսքով՝ ամուսնությունից հետո ծնվել է նրանց առաջնեկը, և Վահանը վերադարձել է Եթովպիա՝ դպրոցում դասավանդելու նպատակով, սակայն իրեն և երեխային երկար ժամանակ թույլ չեն տվել գնալ Հայաստանից՝ պատճառաբանելով, որ Չարենցի հարազատները չպետք է այլ երկրում ապրեն:

Երկար պայքարից հետո Գոհարը կարողացել է մեկնել ամուսնու մոտ և միասին աշխատել են տեղի հայկական դպրոցում: Երեք տարի այնտեղ ապրելուց հետո վերադարձել են Հայաստան: Երևանում լույս աշխարհ է եկել նրանց երկրորդ աղջիկը:

Այնուհետև տեղափոխվել են Հոլանդիա և 25 տարի Եվրոպայում ապրելուց հետո 2011թ. Գոհարն ամուսնու հետ եկել է հայրենիք և մինչ օրս աշխատում է Չարենցի տուն-թանգարանում:

«Թանգարան գալու գաղափարն ինձ օգնեց որոշում կայացնել և գալ Հայաստան: Ասես տուն վերադարձա, որտեղ ինձ գրկաբաց ընդունեցին»,-ընդգծեց Գոհար Չարենցը:

Գոհարը նշեց, որ քույրը բանաստեղծություններ է գրում, աղջիկներից Նարեն ժառանգել է Չարենցի կազմակերպվածությունը, կոկիկությունը, մյուս աղջիկը՝ Սոնան, գրելու ձիրք ունի: Սոնան Լոնդոնում դասավանդել է «Կրեատիվ գրելու արվեստ» առարկան, և նրա օգնությամբ շատ հետաքրքիր գրողներ են բացահայտվել:

«Ցավում եմ, որ չեմ ճանաչել պապիս, սակայն հպարտ եմ, որ նրա ժառանգն եմ և հույս ունեմ, որ մի օր մեր տոհմում նոր Չարենց կծնվի»,-նշեց Գոհար Չարենցը:

Նման հանդիպումները շարունակական բնույթ կունենան: