Օլիգարխներից շատերը ոչ մի կապ չունեն մեր կուսակցության հետ. Համլետ Հարությունյան

«Վարչապետը շատ ճիշտ է ասել, եթե այդ ճշմարտությունը պահպանվի: Պետք է մենաշնորհներին վերջ տրվի, պետք է թույլ տրվի, որպեսզի նրանք, ովքեր ինչ-որ բան են ուզում ներկրել կամ արտահանել, առանց խոչընդոտների այդ գործընթացներն իրականացնեն»,-ԱԺ-ում լրագրողների հետ զրույցում հայտարարեց ԱԺ ՀՀԿ-ական պատգամավոր Համլետ Հարությունյանը՝ մեկնաբանելով վարչապետ Կարեն Կարապետյանի հայտարարությունը, թե այսուհետ ցանկացած մարդ կարող է ներկրումներ իրականացնել: Պատգամավորը նկատեց նաև, որ Հայաստանի 25 տարվա պետականության ընթացքում շատ բաներ են եղել, շատ բաներ են փոխվել, ու կամաց-կամաց հասել ենք այս հանգրվանին, և սրանից հետո էլ այդ փոփոխությունները կլինեն:
Համլետ Հարությունյանը հիշեցրեց նաև հայտնի ֆիլմից թևավոր դարձած խոսքը՝ «Մոսկվան մի օրում չի կառուցվել»: «Բացթողումները ոչ ոք չի ժխտում: Ոչ ոք չի ժխտում նաև, որ Հայաստանում օլիգարխիկ համակարգ կա, ոչ ոք չի ժխտում, որ մենաշնորհներ կան, և վարչապետն իր պատասխանով հաստատեց, որ կա մենաշնորհային ինչ-որ համակարգ, որ պետք է վերացնել»:

Լրագրողի դիտարկմանը՝ նույն ՀՀԿ-ակաները չե՞ն օլիգարխիկ համակարգի մասնակիցները, Հ.Հարությունյանը հավելեց. «Դուք պրովոկացիոն հարց եք տալիս: Ես չգիտեմ: Այդ օլիգարխներից շատերը ոչ մի կապ չունեն մեր կուսակցության հետ: Ես՝ որպես անհատ անձնավորություն, ՀՀԿ անդամ, կատեգորիկ դեմ եմ բոլոր անարդարություններին, անձամբ ինքս թույլ չեմ տվել որևէ օրինազանցություն և դատապարտում եմ նույն օլիգարխներին՝  անկախ իրենց կուսակցական պատկանելությունից, որովհետև դա առաջին հերթին վնասում է ինձ և իմ նմաններին»:

Իսկ թե ո՞ւմ հովանու ներքո են գործել և գործում օլիգարխներ՝ Հ.Հարությունյանը դժվարացավ պատասխանել: Հարցը ճիշտ չհամարելով՝ պատգամավորն ընդգծեց նաև, որ բոլոր երկրներում էլ այդ պրոցեսները զարգանում են առանց հովանավորության, և դա նույնն է, թե մի հանցագործի ասեք, թե ում հովանավորությամբ է հանցանք կատարել: «Վայրի կապիտալիզմի ժամանակաշրջանում նույն գործընթացները եղել են և’ ԱՄՆ-ում, և’ Անգլիայում, և’ Գերմանիայում: Կապիտալի նախնական կուտակումը հիմնականում հանցավոր ճանապարհով է լինում: Եթե Դուք զարմանում եք, թե մեզ մոտ ինչու է այս իրավիճակը, ապա դուք սխալվում եք, որովհետև այս իրավիճակն ավելի ահավոր ձևերով եղել է մյուս կապիտալիստական երկրներում: Մարդիկ, որ հացի կարոտ էին, որոնք երկրորդ դասարանի կրթություն ունեին, միանգամից հարստացան: Այդ կապիտալի նախնական տեսակն իր հետ առաջ է բերում հանցավոր գործունեություն, որովհետև դրանց տերերից շատերը նույնիսկ չգիտեին, որ դա հանցավոր գործությունեություն է: Բայց դա կամաց-կամաց գնում է, զուլալվում, դառնում է իրական կապիտալիզմ, որ մենք մի 25 տարի էլ պետք է ապրենք, որ այդ կլասիկ կապիտալիստական կարգերը մեզ մոտ հաստատվեն: Էլի կլինի օլիգարխիա, էլի կլինի հովանավորչություն, էլի կլինի մենաշնորհ, բայց դրա չափերի մասին պետք է խոսենք»,- եզրափակեց նա: