«Մենաշնորհը` դա ցանկալի երևույթ է պետության համար». Գալուստ Սահակյան

ԱԺ նախագահ Գալուստ Սահակյանը լավատես է և հավատում է, որ նոր կառավարությունը կյանքի կկոչի առաջարկված փոփոխությունների ծրագիրը:

ԱԺ-ում պատասխանելով լրագրողների հարցին՝ կա՞ն արդյոք համապատասխան պայմաններ, որ ծրագրով առաջարկվող փոփոխությունները կկատարվեն, Գալուստ Սահակյանն այսպես արձագանքեց. «Ես այն մարդկանցից մեկն եմ, որ ընդմիշտ ու հավիտյան հույս ունեմ, որովհետև Հայաստանը պետություն է, միջազգային արենայում միշտ առաջ պետք է քայլի»:

Հարցին՝ կհաջողվի՞ արդյոք կոռուպցիայի դեմ պայքարել, ինչպես խոստանում է վարչապետ Կարեն կարապետյանը, խորհրդարանի խոսնակը պատասխանեց. «Ընդ որում ցանկացած կառավարություն՝ լինի Հայաստանում, թե դրսում, առաջին գործոններից մեկը կոռուպցիայի դեմ պայքարն է: Մեզ համար նորություն է, որովհետև ժողովուրդն անընդհատ խոսում է դրա մասին ու լավ կլինի, որ եթե ինչ-որ գործեր բացվեն, եթե դրանք իրոք կան»:

Ինչ վերաբերում է մենաշնորհների դեմ պայքարին, որի մասին իր հայտարարություններում խոսեց նաև նորանշանակ վարչապետ Կարեն Կարապետյանը, Գալուստ Սահակյանն այսպես արձագանքեց. «Մենաշնորհը դա ցանկալի երևույթ է պետության համար, դա բոլոր պետություններում է այդպես: Բայց մենաշնորհը պետք է իրական լինի, ոչ թե այստեղ-այնտեղ մի բան անելով դարձնում են մենաշնորհներ: Իհարկե, պետության մեջ ապրանքներ կան, որոնք մենաշնորհով պետք է գնան և դա՝ ոչ միայն Հայաստանում: Խնդիրը ոչ թե մենաշնորհների դեմ պայքարն է, այլ այն, որ մենաշնորհները ճիշտ առաջանան»,- նշեց ԱԺ նախագահը:

Հակադարձմանը, թե խնդիրը բնական մենաշնորհները չեն, այլ, օրինակ՝ շաքարի կամ բանանի ներկրման մենաշնորհը, Գալուստ Սահակյանը զարմանք արտահայտեց՝ նշելով, թե Հայաստանը փոքր երկիր է. «Եթե նույնիսկ մենաշնորհ էլ լինի այդ ուղղությամբ, հնարավոր է, բայց պետք է ճիշտ ճանապարհով լինի: Մեր բոլորի խնդիրը հենց դա է եղել, մշտապես մտածել ենք, որ ովքեր ուզում են ներմուծել, արտահանել, հանգիստ կարողանան անել, այդ իմաստով առաջիկայում բավական լուրջ արդյունք կլինի»:

ԱԺ նախագահը շեշտեց՝ վարչապետ Կարեն Կարապետյանն ունի և՛ ընդդիմության, և՛ իշխանության, և՛ հասարակության աջակցությունը:

Ճշտող հարցին՝ փաստորեն Կարեն Կարապետյանը հանրության երազած վարչապե՞տն է, Գալուստ Սահակյանը պատասխանեց. «Ժողովուրդը սովորաբար վարչապետներ, ԱԺ նախագահներ չի երազում ունենալ: Ժողովուրդն ուզում է կուշտ ապրել, իր որդիներին, զավակներին լավ պայմաններում տեսնել»: