«Հրապարակ». Անհավասար պայմաններ

Առնվազն տարօրինակ էր լսել, թե ինչպես է նորանշանակ վարչապետը խոստանում հավասար մրցակցային պայմաններ ստեղծել բիզնեսի համար, իսկ ինքը հարցազրույց է տալիս ընդամենը 4 լրատվամիջոցի։ Այո, մեզանում ամենից սուր ընկալվում է անարդարությունը, եւ մարդիկ ոչ միայն դժգոհում են, այլեւ ատում են իշխանությանը, արտագաղթում են երկրից հենց անարդարությունների պատճառով։ Գրում է «Հրապարակ»-ը:

Այդ գիտակցությունն ունեցող վարչապետն ինչպե՞ս է իր մոտ հրավիրում ընդամենը 4 լրագրողների։ Ի վերջո, լրատվությունն էլ է բիզնես, ԶԼՄ-ներն էլ ունեն արդար մրցակցային դաշտում գործունեություն ծավալելու անհրաժեշտություն, եւ մեր դաշտում հավասարություն ապահովելը նույնքան կարեւոր է, որքան շաքարի ու բենզինի շուկայում։ Միանգամայն հասկանալի է, որ վարչապետն առայժմ խուսափում է տհաճ հարցերից, եւ փոքր կազմով տրված ասուլիսն ու դրա «հետեւանքներն» առավել կանխատեսելի ու վերահսկելի են, բայց մի ողջ լրատվադաշտ անտեսելու, այս դաշտում դասակարգում մտցնելու, ԶԼՄ-ները յուրայինների ու օտարների բաժանելու այս ծիծեռնակը ոչ մի լավ բան չի խոստանում։ Ի դեպ, վարչապետը մենակ չէ իր նախաձեռնության մեջ․ ուրբաթ օրը նման մի «ընտրովի» ասուլիս էլ տվել է առողջապահության նախարարը՝ իր մոտ հրավիրելով կրկին միայն TV-ներին: Եվ մի բան էլ․ եթե խնդիրը պարզապես էկրաններին երեւալու մեջ է, անկախ գործած տպավորությունից, գուցե այս ձեւն ընդունելի է։ Բայց եթե նորանշանակներն ուզում են բաց, թափանցիկ գործունեություն ծավալել, հանրության հետ երկխոսության մեջ մտնել, լինել անկեղծ ու պատրաստ՝ պատասխանելու անգամ տհաճ հարցերին, ապա լրատվամիջոցների հետ շփման այլ ձեւեր պիտի ընտրեն։ Ասենք՝ ինչպիսին Լեւոն Տեր-Պետրոսյանի 1997-ի սեպտեմբերյան ասուլիսն էր, որը տեւել է 2 ժամ, եւ 35 հարց է հնչել։

Մանրամասները՝ թերթի այսօրվա համարում: