ՀԱԿ-ը հոգեվարքի մեջ է. փոխխոսնակ

ՀԱԿ-ը ուզում է Լևոն Զուրաբյանին փոխել ու ընտրել ուրիշ ֆրակցիայի ղեկավա՞ր: Աժ-ում լրագրողների հետ զրույցում այսպես արձագանքեց ՀՀԿ խմբակցության պատգամավոր, փոխխոսնակ Էդուարդ Շարմազանովը՝ անդրադառնալով ՀԱԿ-ի այն  հայտարարությանը, որտեղ առաջարկությունների շարք է ներկայացվում ընդդիմադիր քաղաքական ուժերին, ու քաղաքական համախմբման կոչ է հնչեցվում:

Դիտարկմանը, որ ուզում են ՀՀԿ-ին իշխանությունից հեռացնել, Շարմազանովը քմծիծաղով հավելեց. «Ուզում են, թող հեռացնեն: Ի՞նչ ասեմ,- ապա շարունակեց,- ժողովուրդն է ընտրում, թե որ քաղաքական ուժը լինի ընդդիմություն, որն՝ իշխանություն: Քաղաքականության մեջ ընտրությունների միջոցով են ձևավորվում ընդդիմությունն ու իշխանությունը՝ անկախ ՀԱԿ-ի, ՀՀԿ-ի, ԲՀԿ-ի ու ՀՎԿ-ից ցանկություններից ու կամքից, անկախ տարբեր քաղաքական ուժերի ամբիցիաներից: Ժողովուրդն է որոշում՝ ով կգա իշխանության, ով՝ ոչ»:

Իսկ հարցին՝ Շարմազանովը հիշո՞ւմ է դեպք, երբ ժողովուրդն է որոշողը եղել, պատգամավորը հիշեց գրեթե բոլոր ընտրություններն, այդ թվում՝ 2015 թվականի դեկտեմբերին կայացած հանրաքվեն. «1999, 2003, 2007, 2008, 2012 թվականների ընտրությունները, վերջին ՏԻՄ ընտրությունները….Ես չեմ բացառում, որ թերություններ եղել են, բայց այդ թերությունները պետք է էականորեն ազդեին ընտրությունների արդյունքների վրա: Մենք տեսանք՝ այո, ընդդիմության մի լուրջ զանգված ձայն չտվեց իշխանությանը, բայց նաև ձայն չտվեց ՀԱԿ-ին: Մենք տեսանք, որ Գյումրիում և Վանաձորում ձայներ ստացան ԳԱԼԱ-ն, ԲՀԿ-ն ու ՀՎԿ-ն, բայց՝ ո՛չ ՀԱԿ-ը: Միգուցե ՀԱԿ-ը հոգեվարքի մե՞ջ է… Մի քաղաքական ուժ, որը ճգնաժամի մեջ է, որը մասնակցում է ընտրությունների և երկու տեղում էլ անհաջողություն գրանցում, դա հուշում է այն մասին, որ նա իսկապես խնդիրներ ունի»,- ԼՈՒՐԵՐ.com-ի հարցին ի պատասխան՝ նշեց պատգամավորը:

Ինչ վերաբերում է ՀԱԿ-ի շուրջ համախմբմանն, ապա՝ Է. Շարմազանովը շեշտեց, որ այսօր քաղաքական ուժերը համախմբվում են մասնավորապես այն ուժի շուրջ, որն ամենաազդեցիկն է: Նրա խոսքով, սակայն, վերջին ՏԻՄ ընտրությունները ցույց տվեցին, որ այս պահին ո՛չ Վարդան Օսկանյանի «Համախմբում»-ը, ո՛չ էլ ՀԱԿ-ը ընդդիմության ազդեցիկ ուժերը չեն: «Երկուսն էլ թե՛ Վանաձորում, թե՛ Գյումրիում մասնակցեցին, բայց ընդդիմադիր այլ ուժեր նրանցից առավել ձայն հավաքեցին: Վաղը կլինեն, թե՝ ոչ, դա նույնպես չեմ կարող ասել, բայց երբ կմիավորվեն, այն ժամանակ էլ կխոսենք. ես մշուշոտ եմ համարում ՀԱԿ-ի շուրջ համախմբումը»,- ընդգծեց նա:

Շարունակելով խոսքը՝ պատգամավորը նկատեց նաև, որ այսօր արդեն կան ուժեր, որոնք հայտարարել են, որ չեն պատրաստվում համախմբվել ՀԱԿ-ի հետ: «Այսօր ընդդիմադիր ուժերը համախբվում են ոչ թե նրա շուրջ, ում «պրիչոսկեն» դուր է գալիս, այլ՝ գաղափարի, իսկ ՀԱԿ-ի գաղափարը մեզ հայտնի չէ: Ամբողջ աշխարհում ընդունված է, որ երկրի արտաքին քաղաքական դոկտրինը պետք է լինի առաջնային, իսկ մեզ մոտ հակառակն է: Իշխանափոխությունը ո՛չ գաղափար է, ո՛չ էլ նպատակ: Այն ուժը, որի գաղափարի հիմքում ընկած է միայն իշխանափոխությունը, հետընտրական պրոցեսներում տանուլ կտա»,- ասաց նա: