Արագած Ախոյանը դեռ մտածում է...

Առայժմ չեմ որոշել իմ հետագա քայլերը, բնականաբար կմիանամ այն ուժին, որն ինձ ավելի հոգեհարազատ է: ԼՈՒՐԵՐ.com-ի թղթակցի հետ զրույցում այսպես արձագանքեց ԱԺ նախկին ԲՀԿ-ական պատգամավոր Արագած Ախոյանը, պատասխանելով հարցին, թե ո՞ր կուսակցության հետ է մտադիր շարունակել իր հետագա քաղաքական գործունեությունը:

Հիշեցնենք, որ պատգամավորը մի քանի պատգամավորների հետ միասին լքեց ԲՀԿ շարքերը հայտնի փետրվարյան իրադարձություններից հետո:

Մեր դիտարկմանը, որ մամուլը գրել է, թե Ձեր և մյուս նախկին ԲՀԿ-ականների ճակատագիրը կորոշվի մասնավոապես ՀՀԿ համագումարի ժամանակ, արդյոք մտադիր չեք միանալ այդ ուժին, պատգամավորն ասաց. «Անկեղծ ասած՝ առաջին անգամն եմ լսում այդ մասին: Ինչ վերաբերում է մյուսներին, ապա ես չգիտեմ նրանց մտադրությունների մասին: Այս ոլորտում բոլորն ազատ են իրենց ընտրություններում և ամեն մեկը յուրովի է պատկերացնում իրենց հետագա ուղին: Երբ լքում էինք ԲՀԿ-ն՝ բոլորը միակարծիք էին, բայց այս պահին հնարավոր է տարակարծություններ առաջանան: Այնպես չէ, որ խմբով ենք որոշում, թե ով և ինչ պետք է անի, բայց ես չգիտեմ, թե իմ մյուս գործընկերներն ինչ մտադրություններ ունեն: Բնականաբար, տարբեր ուղղություններից կան առաջարկներ, բայց կարծում եմ դեռ կա ժամանակ և մենք չենք շտապում: Ես կընտրեմ այն ճանապարահը, որն ինձ ավելի հոգեհարազատ է, որը կհամապատասխանի իմ գաղափարներին, իմ ծրագրերին ու մոտեցումներին: Առայժմ այդ մասին չեմ մտածել»,- ասաց նա՝ հավելելով, որ իր հետագա քայլերը կախված կլինեն նաև քաղաքական հետագա զարգացումներից:

Ա. Ախոյանի խոսքով՝ ինքն առայժմ կհետևի, թե քաղաքական դաշտում ինչ վերադասավորումներ ու խմորումներ տեղի կունենան, ըստ այդմ էլ համապատասխան որոշում կկայացնի: «Ընտրացուցակներում ընդգրկվելու համար պարտադիր չէ նաև լինել կուսակցական: Կարող եմ լինել անկուսակցական, բայց լինել որևէ քաղաքական ուժի ռեյտինգային ցուցակում»,- շեշտեց նա:

Ինչ վերաբերում է ՀԱԿ-ի շուրջ համախմբմանը, պատգամավորն այս հարցին քմծիծաղով մոտեցավ: Ավելին՝ պատգամավորը ՀԱԿ-ին հորդորում է համախմբվել նախ ներսում, հետո համախմբության կոչերով հանդես գալ: «Անկեղծ ասած՝ ծիծաղս եկավ… Նախ ՀԱԿ-ը թող ներսում համախմբվի նոր կոչ անի ու ուրիշներին միավորի: Սկզբում նրանք շատ համախմբված էին, բայց շատ արագ տեսանք, թե ինչպես խմբակցությունից վերածվեցին անհատականությունների, և ամեն մեկը մի ուղղությամբ գնաց: Չեմ կարծում, որ նման կուսակցությանը կհաջողվի միասնական հարթակ ձևավորել: Այդ առաջարկն անհեռանկար եմ համարում: Կտրուկ պատասխանում եմ՝ ես չեմ միանա նրանց»,- եզրափակեց պատգամավոր:

Արմինե Եփրեմյան