«Համախմբում»-ը դեմ չէ միասնականությանը. Ստեփան Մարգարյանը չի բացառում ՀԱԿ-ի հետ համագործակցությունը

ԱԺ պատգամավոր, «Համախմբում» կուսակցության փոխնախագահ Ստեփան Մարգարյանը թեև ծանոթ չէ ՀԱԿ-ի հայտարարությանը, սակայն չի բացառում այս կամ այն քաղաքական ուժի հետ համագործակցությունը: ԱԺ-ում, լրագրողների հետ զրույցում պատգամավորը նշեց, որ «Համախմբումը» դեմ չէ միասնականությանը, քանի որ դա միակ ելքն է երկրում փոփոխություններ իրականացնելու համար: «Թե որքանով կհաջողվի և ովքեր կմիանան ՀԱԿ-ին, ես որևէ բան այս պահին չեմ կարող ասել: Ընդհանրապես՝ միասնական բևեռ ձևավորելու գաղափարին դեմ չեմ»,- ասաց պատգամավորը:

Նա հավաստիացրեց նաև, որ այս պահին որևէ քաղաքական ուժի հետ քննարկումներ չեն ընթանում: Ավելին՝ այդ առումով քննարկումներ չեն ընթացել նույնիսկ նեղ կուսակցական շրջանակներում:

Դիտարկմանը՝ Ձեզ նկատել են ՀԱԿ ֆրակցիայի ղեկավար Լևոն Զուրաբյանի հետ, Ստեփան Մարգարյանը շեշտեց, որ նրա հետ «բարև-բարլուս տալը» հանցագործություն չէ, իսկ ենթադրությունները տեղին չեն: «Չէ, որևէ բան առայժմ չկա: Իսկ ընդհանրապես, կոնսուլտացիաների հեռանկար մենք տեսնում ենք, սակայն դա այն ժամանակ, երբ որ մենք ինքներս պատրաստ կլինենք: Մենք անպայման կքննարկենք ու վերջնական որոշում կկայացնենք: Իսկ առայժմ, ինքնես չունենք այդպիսի հատուկ քննարկված որոշում՝ ինչ կամ ոնց անել, սակայն միասնականության գաղափարը ողջունում ենք. այդ մասին նույնիսկ հայտարարել ենք»:

ԼՈւՐԵՐ.com-ի հարցին՝ որքա՞ն եք գնահատում հաջորդ Խորհրդարանում հայտնվելու Ձեր շանսերը, կկարողանա՞ք միայնակ հաղթահարել այդ ընտրապայքարում, Ստեփան Մարգարյանը պատասխանեց, որ վերջին ՏԻՄ ընտրությունները ցույց տվեցին, որ «Համախմբումը» բավականին լուրջ շանսեր ունի: «Եթե ստեղծել ենք կուսակցություն և առանձին մտել ենք քաղաքական ասպարեզ, իհարկե, հնարավոր համարում ենք: Մենք բավականին բարձր շանսեր ունենք: Իսկ, թե ինչպիսին կլինեն ընտրությունները, ցույց կտա ժամանակը: Կապրենք ու կտեսնենք: Մեր ռեսուրսները բացի մեզանից ոչ ոք չի չափել ու չգիտի, թե որքան են: Վերջին ընտրությունները ցույց տվեցին, որ ժողովուրդը հակված է ընդդդիմությանը, իսկ երկրում փոփոխության հասնելու միակ ձևն այսօր ընդդիմության ու ոչ իշխանական քաղաքական ուժերի միասնականությունն է: Առանձին հանդես գալով, այդ ձայները փոշիանում են»,- ասաց նա: