Հանելուկային Լեռնիկ Ալեքսանյանը

Արդյոք ովքե՞ր են…

Պատգամավորներ են, ովքեր նստած ԱԺ փափուկ աթոռներին, երևի թե հանուն ազգիս բարօրության կամ ի շահ իրենց՝ օրենքներ են ընդունում ու մերժում, ասում, խոսում, քննարկում ու քննարկվում…

Արդեն 4 տարի է՝ 131 պատգամավոր ապրում է մեր վճարած հարկերի շնորհիվ ու երևի թե սրտատրոփ սպասում 2017-ին. մեկ էլ տեսար՝ վերընտրվեց, մեկ էլ տեսար…

Քանի որ հաշված ամիսներ են մնացել մինչեւ ԱԺ ընտրությունները, մենք շարունակում ենք վերհիշել նրանց գործունեությունը՝ մեկ առ մեկ ներկայացնելով նրանց անցած ուղին:

ԼՈւՐԵՐ.com-ի դիտակետում հայտնված հաջորդ պատգամավորը ԱԺ ՀՀԿ խմբակցության պատգամավոր Լեռնիկ Ալեքսանյանն է:

Ծնվել է 1952թ. հոկտեմբերի 16-ին, Արարատի շրջանի Արարատ գյուղում:

1974թ. ավարտել է Երեւանի պոլիտեխնիկական ինստիտուտը, 1985թ.՝ ԽՄԿԿ ԿԿ առընթեր Բաքվի կուսակցական բարձրագույն դպրոցը:

Ճարտարագետ-մեխանիկ:

1974-1975թթ. դասավանդել է Արարատի ինդուստրիալ-տեխնիկական տեխնիկումում: 1975-1980թթ. աշխատել է Արարատի գազի վարչությունում՝ որպես գլխավոր մեխանիկ, 1980-1983թթ. եւ 1985-1990թթ.՝ ՀԿԿ Արարատի շրջկոմում կուսակցական տարբեր պաշտոններ է զբաղեցրել: 1990-1993թթ. եղել է Արարատի շրջանի կապի հանգույցի պետ, 1993-1996թթ.՝ Արարատի շրջխորհրդի գործկոմի նախագահի առաջին տեղակալ, 1996-1998թթ.՝ Արարատի մարզպետարանի տրանսպորտի եւ ճանշինբաժնի վարիչ, 1998-1999թթ.՝ Արարատի փոխմարզպետ:

1998-1999թթ.՝ ԱԺ պատգամավոր (թիվ 111 ընտրատարածք): «Բարեփոխումներ» պատգամավորական խմբի անդամ:

1999-2003թթ.՝ ԱԺ պատգամավոր (թիվ 34 ընտրատարածք): ԱԺ պետական-իրավական հարցերի մշտական հանձնաժողովի անդամ:

«Միասնություն» խմբակցության անդամ:

2003-2007թթ.՝ ԱԺ պատգամավոր (համամասնական ընտրակարգ, ՀՀԿ): ՀՀԿ խմբակցության անդամ:

2007-2008թթ. զբաղվել է հողագործությամբ:

06.10.2008-31.05.2012թթ.՝ Ազգային ժողովի պատգամավոր (համամասնական ընտրակարգ, ՀՀԿ): 08.12.2008-31.05.2012թթ.՝ Ազգային ժողովի ֆինանսավարկային եւ բյուջետային հարցերի մշտական հանձնաժողովի անդամ: ՀՀԿ խմբակցության անդամ: ՀՀԿ խորհրդի անդամ:

2014թ. ապրիլի 18-ին Ազգային ժողովի պատգամավոր է ընտրվել համամասնական ընտրակարգով, Հայաստանի Հանրապետական կուսակցությունից:

Լեռնիկ Ալեքսանյանն այն պատգամավորներից է, առանց որոնց ԱԺ-ն այլևս ոչ մի կերպ չենք կարող պատկերացնել: Նա հավերժ պատգամավոր է՝ 1998-ից մինչ օրս. մի ամբողջ բանական կյանք:

Հարցն այն է, որ պարոն պատգամավորը երբևէ բանական-օրենսդրական նախագծերով հանդես չի եկել: 18 երկար ու ձիգ տարիների ընթացքում Ալեքսանյանը երբեք չի փայլատակել:

Այսինքն՝ ոչ թե 18, այլ՝ 16… Դե 2012-ին նա չհայտնվեց ԱԺ-ում, սակայն երկու տարի անց նրա աստղը կրկին բոցավառվեց, երբ Հովիկ Աբրահամյանը լքեց խորհրդարանը:

2014թ.-ի ապրիլին ՀՀԿ համամասնական ցուցակով պատգամավոր ընտրված ԱԺ արդեն նախկին նախագահ Հովիկ Աբրահամյանի պատգամավորական լիազորությունները վաղաժամկետ դադարեցվել էին ՝ ապրիլի 13-ին վարչապետ նշանակվելու կապակցությամբ:
Արդեն ապրիլի 18-ին Կենտրոնական ընտրական հանձնաժողովը նիստ հրավիրեց ու Ազգային ժողովի համամասնական ընտրակարգով ՀՀԿ-ի թափուր մանդատը բաժին հասավ կուսակցության ընտրական ցուցակի հերթական հաջորդ թեկնածուին՝ ԱԺ նախկին պատգամավոր, ՀՀԿ խորհրդի անդամ Լեռնիկ Ալեքսանյանին:

Վերջ: Նա կրկին պատգամավոր է, որ հասցրել էր մինչ մանդատ վերցնելը հանդիպել լրագրողներին ու լուրջ հայտարարություն անել.
«Շատերը ԱԺ-ի գործունեությունը պատկերացնում են ամբիոնից խոսելը, իսկ ես ցանկանում եմ հանձնաժողովներում աշխատել: Այսինքն' քիչ խոսել, շատ աշխատել և կոճակ սեղմել՝ քվեարկություններին մասնակցել»…
Պատգամավորն իր խոսքի տերն է:

Parliamentmonitoring.am կայքի տվյալներով՝ մինչ օրս պատգամավորը տվել է ընդամենը 4 հարց, ունեցել 6 ելույթ: Փոխարենը՝ շատ ակտիվ քվեարկել է: 543 անգամ՝ կողմ: Ընդամենը 2 անգամ է դեմ եղել, մեկ անգամ էլ ձեռնպահ է մնացել:

Ի դեպ, նրան կարելի է դասել ամենապարտաճանաչ պատգամավորների շարքին՝ նիստերին հաճախելու առումով: Ալեքսանյանն ունի ընդամենը 2 բացակա:

Դե, մեծ մարդ է, հիվանդանալ կա, բան կա, վերջիվերջո՝ գործեր ունի. Արարատի մազրում գյուղատնտեսական բիզնեսով է զբաղվում:

Ալեքսանյանը չի փայլում նաև ֆինանսական եկամուտներով՝ պարբերաբար հարցազրույցներ տալով, սիրում է խոսել իր փոքրիկ ծիրանի այգու մասին, ասել, որ վարկով է մեքենա գնել…

Դարի հարցն է մնում, թե այդ ո՞ր գերբնական ուժի շնորհիվ է Լեռնիկ Ալեքսանյանը պահում իր մանդատը, եթե նրանից օգուտ չունի ո՛չ ժողովուրդը, ո՛չ էլ իշխանությունը: Ընդամենը քվեարկելով՝ լավություն չես անի:

Հարուստ կոճակ սեղմողներ շատ կան:

Անի Սահակյան