Պատգամավորները խոստացել են օգնել ՊՆ-ից տուժած նախկին պայմանագրային զինծառայողին

ԼՈՒՐԵՐ.com-ը շարունակում է անդրադառնալ նախկին պայմանագրային զինծառայող Մարատ Շամիրյանի խնդրին: Նախկին պայմանագրային զինծառայողը մոտ 1 տարի առաջ բանակից հեռացվել էր՝ իբր շիզոֆրենիա հիվանդություն ձեռք բերելու պատճառով: Մարատն այդ օրվանից սկսած՝ պայքարում է, որպեսզի իր ախտորոշումը, որ տվել է Պաշտպանության նախարարությունը, փոխվի, քանի որ, իր պնդմամբ, ինքը որևէ հիվանդություն ձեռք չի բերել, այլ՝ իր հանդեպ հաշվեհարդար է տեղի ունենում: 

Մարատ Շամիրյանն ամեն օր լինում է տարբեր գերատեսչություններում՝ իր խնդրին ուշադրություն դարձնելու խնդրանքով: Նա ցանկանում է հանդիպել Պաշտպանության նախարար Վիգեն Սարգսյանի հետ, սակայն, նախարարությունում համառորեն նրան չեն գրանցում նախարարի մոտ ընդունելությանը մասնակցելու համար: Նախարարության դիմում բողոքների և նամակների ընդունման բաժնի պետ Աշիկ Պողոսյանը մեզ հետ զրույցում այդպես էլ չկարողացավ հստակ մեկնաբանել՝ ինչու թույլ չեն տալիս Մարատին հանդիպել նախարարի հետ, չեն գրանցում կամ գրանցում են մի քանի ամիս հետո մտնելու համար: 

Մարատը մեզ հետ զրույցում ասաց, որ այսօր եղել է Ազգային ժողովում, հանդիպել Զարուհի Փոստանջյանի, Սամվել Նիկոյանի, Առաքել Մովսիսյանի հետ, ովքեր նրան խոստացել են որևէ բանով օգնել: Սամվել Նիկոյանը Մարատին խոստացել է՝ անձամբ կխնդրի նախարար Վիգեն Սարգսյանին ընդունել նրան, իսկ Առաքել Մովսիսյանը խոստացել է գոնե աշխատանքով օգնել: 

Իսկ առողջապահության փոխնախարար Տիգրան Սահակյանը, ով ԱԺ նախագահ Գալուստ Սահակյանի որդին է, Մարատին այսօր անձամբ է ընդունել և խորհուրդ տվել Էջմիածին քաղաքի պոլիկլինիկայից ներկայացնել մի քանի փաստաթուղթ, ըստ որի՝ Մարատը կարող է նորից բուժզննում անցնել: Սակայն նախկին պայմանագրային զինծառայողը վստահություն չունի, որ բուժզննումը կարող է օբյեկտիվ անցնել: Նշենք, որ Մարատի միակ պահանջը նորից ՊՆ-ում ծառայության անցնելն է: