ԾԻԳ-երը ոչ թե կրճատելու, այլ դրանք վերաիմաստավորելու ենք. Վարդան Արամյան

Ֆինանսների նախարար Վարդան Արամյանը օպտիմալցման հետ կապված՝ ունի սեփական մոտեցումները. դա,  ըստ նրա՝ ավելի արդյունավետ կդարձնի նախարարության աշխատանքը: ԱԺ-ում լրագրողների հետ զրույցում նախարարից հետաքրքրվեցին, թե ինչպե՞ս են պատրաստվում լուծել մասնավորապես ԾԻԳ-երի հարցը, որն իր հետ նաև առաջացնելու է գործազրկության խնդիր, նախարարը նշեց, որ առաջիկայում նման վտանգ չի սպառնում և հավելեց, որ ֆինանսների նախարարությունը մտադիր է ոչ թե կրճատել ԾԻԳ-երը, այլ դրանց ունեցած ռեսուրսներն ավելի արդյունավետ օգտագործել:

«Վարչապետն ասել է, որ այդ փոփոխությունները վերաբերում են հարկատուների գումարներին, որոնք պետք է արդյունավետ օգտագործվեն և լինեն հնարավորինս նպատակային: Եթե մենք ծախսում ենք այդ միջոցները՝ նպատակ ունենալով ստեղծել միայն նոր աշխատատեղ, որը տնտեսության համար նոր արժեք, նոր մոտեցումներ ու ծառայություններ չի ստեղծում, ես կարծում եմ, որ դա արդյունավետ չէ: Դա հանգեցնում է նրան, որ մենք այսօր ունենք ցածր տնտեսական ցուցանիշներ: Բայց, եթե մենք հրաժարվենք ԾԻԳ-երը գլխատելու գաղափարից և համախմբած օգտագործենք նրանց ձեռքի տակ եղած ռեսուրսներն, ապա կունենանք բավականին լավ ցուցանիշներ»,- համոզմունք հայտնեց նախարարը:

Վարդան Արամայանը շեշտեց, որ այսօր ֆինանսների նախարարությունն ունի գործող տասներեք ԾԻԳ-եր, որոնք կառավարում են երեսուներկու ծրագիր և ըստ նրա՝ հրաժարվել այդ գաղափարից տեղին չէ, քանի որ այսօր ԾԻԳ-երն ունեն բավականին լավ ռեսուրսներ: «Աշխատողների թվաքանակը երեք հարյուր հիսունվեց է և պահպանման ծախսերը կազմում են շուրջ երեսուներկու մլրդ դրամ: Ամբողջ համադրումները երբ վերլուծում ու դնում ենք իրար կողք կողքի, գալիս ենք վարչապետի հանձնարարականին՝ արդյո՞ք մենք կարող ենք նույն արդյունքն ապահովել՝ ավելի արդյունավետ օգտագործելով մեր ձեռքի տակ եղած ռեսուրսները: Ես կարծում եմ՝ այո: Ֆինանսների նախարարության ԾԻԳ-երը մենք ոչ թե գլխատելու կամ ընդհանրապես հրաժարվելու ենք, այլ դրանք վերաիմաստավորելու ենք: Մենք գնալու ենք ԾԻԳ-երի համախմբման գաղափարով, որպեսզի նույն այդ ԾԻԳ-երն իրենց առջև դրված խնդիրներն ավելի օպտիմալ լուծեն՝ օգտագործելով իրենց ձեռքի տակ եղած բոլոր ռեսուրսները»: