Ֆիննախի դպրոցը կլուծարվի

ՀՀ Ֆինանսների նորանշանակ նախարար Վարդան Արամյանը չի ցանկանում անդրադառնալ նախկին նախարար Գագիկ Խաչատրյանի աշխատանքին: Այս մասին ԱԺ-ում պաշտոնապես հայտարարեց նախարարը՝ նշելով, որ դա սկզբունք է, սակայն կարծում է, որ յուրաքանչյուր լումա կարելի է ավելի արդյունավետ ծախսել:

Թե ինչ ճակատագիր է սպասվում ֆինանսների նախարարության Դիլիջանի ուսումնական կենտրոնին, քանի որ մամուլում գրվեց, որ այն վաճառվելու է, Վարդան Արամյանը պատասխանեց. «Ոչ թե դա հանելու ենք վաճառքի, այլ մենք քննարկում ենք տարբերակները: Ուսումնական կենտրոնը ՊՈԱԿ է, դա վաճառքի չի հանվի, բայց մենք այն ևս վերաիմաստավորելու ենք: Ես կարծում եմ, որ մենք գնալու ենք այն տարբերակով, որ լուծարենք»,- ասաց նա՝ նշելով, որ խնդիր կա, որովհետեւ ուսումնական հաստատությունները չեն համագործակցում պետության հետ:

Նախարարի խոսքով՝ ցանկացած քայլ անելուց առաջ ինքը լսում է շահագրգիռ կողմերի կարծիքները, բայց բոլորին տալիս է մեկ հարց, «Խնդրում եմ ինձ պատասխանեք. այն գումարները, որոնք ծախսվում են ձեզ վրա, ի՞նչ արդյունավետություն ենք մենք ստեղծում տնտեսության համար, ովքե՞ր են օգտվում ձեր ծառայություններից և արդյո՞ք այդ ծառայությունները մասնավորի կողմից չեն մատուցվումնույն ծառայությունները մասնավորի կողմից մատուցվում են եւ հարց է առաջանում, թե ինչո՞ւ է պետությունը նույն ծառայությունը կրկնօրինակում:

Հարցին՝ իսկ շենքը, կահույքը ի՞նչ է արվելու, նախարարը հավելեց. «Դա արդեն պետք է հանձնվի պետգույքի կառավարման վարչությանը, որն էլ ունի կառավարության որոշմամբ հատուկ հաստատված ծրագիր: Ես մտադիր եմ նույն ծառայությունն իրականացնել այլ ուսումնական հաստատությունների միջոցով»:

Նախարարը դժվարացավ ասել, թե այդ շենքն աճուրդով կվաճառվի, թե՝ ոչ, սակայն ընդգծեց, որ անիմաստ է նորը կառուցել:

Վարդան Արամյանը չցանկացավ նաև գնահատական տալ նախկին նախարար Գագիկ Խաչատրյանի աշխատանքին, քանի որ դա նրա համար սկզբունք է: Նա ևս մեկ անգամ շեշտեց, որ պետք է խելամիտ մոտենալ յուրաքանչյուր հարկատուի գումարներին և ավելացրեց. «Երբ որ խոսում ենք կարողությունների մասին, մենք ստեղծում ենք մրցակցային միջավայր, որպեսզի պետություն ստեղծող համակարգերը մրցեն նախագծերի համար»: